28 ноября 2009 г.
НИКОЛАЙ Степанович Падиаров пирĕн кÿршĕре пурăнатчĕ. Яштака пÿллĕ те хитрескер, ача-пăчапа шÿтлеме-юмахлама юрататчĕ. Вăл пире хăвăрт чупма, сикме вĕрентетчĕ, мала тухакансене тетрадь хучĕсем парса хавхалантаратчĕ.
Ун чух Николай Степанович Хусан университечĕн физикăпа математика факультетĕнче вĕренетчĕ. Кунтанах ăна салтака илнĕ. Киеври иккĕмĕш пехота училищин курсанчĕ пулнă. Тăван çĕршывăн Аслă вăрçи пуçлансан, курсантсене вăхăт çитичченех лейтенант званийĕ парса фронта ăсатнă. Н.Падиаров лейтенант 135-мĕш стрелковăй дивизин 497-мĕш стрелковăй полкĕнче рота командирĕ пулса çапăçать.
Каярахпа Н.Падиаров виççĕмĕш Украина фрончĕн 9-мĕш гварди мотопехота бригадинче стрелковăй ротăна ертсе пырать, 244-мĕш стрелковăй дивизин 911-мĕш стрелковăй полкĕнче, 19-мĕш механизированнăй дивизин 62-мĕш механизированнăй полкĕнче рота командирĕ пулать.
Çапăçури паттăрлăхшăн Н.Падиаров лейтенанта Тăван çĕршыв Хĕрлĕ Çăлтăр орденпа тата медальсемпе наградăланă.
Вăрçăран таврăнсан Н.С.Падиаров нумай çул хушши Виçпÿрт Шăмăршă шкулĕнче математика вĕрентрĕ. Ялти хисеплĕ çынсенчен пĕриччĕ вăл. Çарпа патриотизм ĕçне пысăк хавхаланупа туса пыратчĕ. Вăл вĕрентнĕ çамрăксенчен çиччĕшĕ офицер профессине суйласа илчĕç.
Николай Степанович ытла та ир – 53 çула çитсенех çĕре кĕчĕ. Унтанпа 35 çул çитрĕ пулин те, ял-йыш ырă кăмăллă та хастар учителе, паттăр фронтовика асрах тытать.