16 декабря 2009 г.
ПАЛТИЕЛĔНЧИ вăтам шкулта тĕрлĕ мероприятисем тăтăш иртеççĕ. Ачасем хăйсен ашшĕ-амăшĕсемпе пĕрле конкурссенче ăмăртасси те йăлана кĕнĕ. Акă, çак кунсенче 2-мĕш класра вĕренекенсем «Туслă çемье – пысăк телей» уяв-конкурсра вăй виçрĕç. Çемьесен конкурсне Габитовсен, Макаровсен, Минулловсен, Тазетдиновсен, Емдихановсен тата Кузьминсен çемйисем хутшăнчĕç.
Мероприятин программи ваттисен сăмахĕсене аса илессинчен пуçланчĕ. Кун хыççăн вара çемьесенчи ачасемпе çыхăннă тĕрлĕ пăтăрмахсен ыйтăвĕсене татса парассипе çыхăннă заданисем пулчĕç. Кил-çуртри ĕçсене вăйă евĕр ирттерни те конкурса илем кÿчĕ.
Уявра спортпа çыхăннă ăмăртусем те пулчĕç. «Виç урапа чупасси» вăйăра амăшĕн сылтăм урипе ачин сулахай урине çыхса чупни, хăмпăсемпе волейболла выляни те конкурса хутшăннисемшĕн чылайлăха асра юлĕ. Туслă та хаваслă çемьесем юрлас тĕлĕшпе те ăсталăх кăтартрĕç. Ача-пăча юррисене пĕри тепринчен илемлĕрех шăрантарчĕ. Юлашкинчен пурте пĕрле «Эпир сире телей сунатпăр» юрă юрларĕç.
Конкурсри заданисем вĕçленнĕ хыççăн жюри çемьесене тĕрлĕ номинацисем тăрăх Грамотăсемпе, призсемпе чысларĕ. Хаваслă тĕл пулу амăшĕсем хатĕрлесе килнĕ тутлă апат-çимĕçпе тата техĕмлĕ чейпе пуянлатнă сĕтел хушшинче малалла тăсăлчĕ.