26 декабря 2009 г.
ЧАСАХ 2009 çул ĕмĕр историне кĕрсе юлĕ. Пире çутă ĕмĕтпе, çĕнĕ вăй-хăватпа пурăнма хавхалану кÿрсе, темиçе кунтан Кремль куранчĕсем 2010 çул пуçланни пирки пĕлтерĕç.
Тĕнче кризисĕн йывăрлăхĕсене пула кăçалхи çул çăмăлах килмерĕ. Апла пулин те, йывăрлăхсене çĕнтерсе пыма тăрăшса, тăван районăмăр малаллах утăмларĕ, республикăри экономикăпа социаллă пурнăç аталанăвĕнче хăйĕн тÿпине хыврĕ.
2009 çулта «Шăмăршă хыпарĕ» хаçат тăван районăн тĕрлĕ енлĕ аталанăвне, пурнăçне тĕрĕс тата пĕр тикĕс çутатса тăма тăрăшрĕ, унăн историне малалла çырчĕ. Кăçалхи çула Çамрăксен тата Çĕр ĕçченĕн çулталăкĕ тесе палăртнă май, çак темăсемпе «районка» нумай статьяпа тĕрленчĕк, заметка пичетлерĕ. Хастар ял ĕçченĕсем, фермерсем, пултаруллă çамрăксем вĕсенче тĕп вырăн йышăнчĕç.
Фашистла Германие çĕнтернĕренпе килес çул 65 çул çитет. Тăван çĕршывăмăрăн чаплă юбиейне хатĕрленсе, ентешĕмĕрсен фронтри паттăрлăхне, тылри хастарлăхне çутатакан статьясем кăçал чылай пичетленчĕç. 2010 çулта çак пархатарлă ĕçе хаçат редакцийĕ малалла илсе пырĕ. Фронтовиксенчен, 1941-1945 çулсенче çар тивĕçне пурнăçланă ватă салтаксенчен, тыл ветеранĕсенчен эпир ас-илÿсем кĕтетпĕр. Вĕсем район çыннисен Аслă Çĕнтерĕве хывнă вышкайсăр пысăк тÿпине, патриотла туртăмне анлăрах та туллинрех кăтартса пама пулăшĕç.
Хаçат тусĕсен – обществăлла корреспондентсен пĕлтерĕшĕ калама çук пысăк. Вĕсен тĕрленчĕкĕсемпе статйисем, заметкисем районăн тĕрлĕ енлĕ аталанăвĕпе пурнăçне пĕр тикĕс çутатса пыма май параççĕ. Ялсенчен килсе тăракан кашни материала кăмăллăн йышăнатпăр эпир, вĕсене çийĕнчех пичетлеме тăрăшатпăр. Çĕнĕ çул умĕн хаçатăн хастар обществăлла корреспонденчĕсене ятран асăнса хăваратпăр. Вĕсем – Шăмăршă ялĕнчи М.Захаров, Ф.Кузнецова, П.Фомин, В.Захаров, А.Табаковапа Л.Еливанов, вырăнти вăтам шкулти педагогсем: З.Головинская, В.Хорьковапа Н.Милюшкина, район администрацийĕнче тĕрлĕ пайсенче тăрăшакан Н.Ендиеров, О.Никифорова, Э.Жамкова, Е.Федорова, А.Чумуркина, А.Петрова, Г.Иванова, В.Антонов, районти прокуратурăра вăй хуракан И.Мифтахутдинов, Е.Латышевапа В.Федоров, РФ Прокуратурин ЧР Управленийĕн Патăрьелĕнчи пайĕн работникĕ В.Егоров, шалти ĕçсен районти пайĕн сотрудникĕсем: К.Махмутов, А.Алексеев, Н.Рубцов, Г.Иванова, Ф.Марков, С.Прохоров, В.Дмитриев, А.Петьков, Н.Мазякова, суд приговорĕ пурнăçланнине тĕрĕслекен районти инспекци сотрудникĕ А.Архипов, миграци службин районти пункчĕн ĕçченĕсем И.Севрюгинпа Т.Кувшинова, патшалăх пушар надзорĕн офицерĕсем Ф.Фоминпа А.Бородов, районти пушар чаçĕнчи А.Фоминпа Г.Измайлов, адвокатра тăрăшакан В.Харитонов, санэпиднадзор службинчи А.Савельевапа Л.Никитина, районти халăха ĕçпе тивĕçтерекен центр работникĕ С.Кузьмин, ачасемпе çамрăксен спорт шкулĕнчи А.Ичанкинпа А.Филиппов, С.Моисеева, ача-пăча искусство шкулĕнчи Ю.Цыганова, З.Морозовапа Т.Яковлева, Патăрьелпе Шăмăршă районĕсен çар комиссариатĕнчи Д.Захаровпа А.Шулепов, районти больницăра ĕçлекен О.Львов, А.Семкин, Н.Полякова, А.Семенова, А.Анчунова, Е.Долгова, И.Поляковпа И. Смирнова, Шăмăршăри Культура керменĕнче вăй хуракан В.Павловпа Т.Сергунова, культура сферинче ĕçлекен информаципе методика центрĕнче тăрăшакан В.Львовапа Е.Еремеева, Шăмăршă ял поселенийĕн тĕп библиотекинче ĕçлекен С.Ларионова, О. Присмотровапа Л.Владимирова, Карапай Шăмăршă ялĕнчи В.Денисов, А.Шомполова, И.Солдатова, З.Падюкова, А.Алексеевапа Э.Семенов, Виçпÿрт Шăмăршăри И.Гладкова, А.Ухтияров (Шупашкарта ĕçлесе пурăнать), П.Падиаров, И.Петров, Г.Мурзина, вырăнти шкулта вĕренекен В.Гладков, К.Алюкова, А.Федоров, М.Семенова, Анат Чаткасри А.Лукианова, Палтиелĕнчи З.Свеклова, М.Гайнулловапа А.Паймин, вырăнти шкулта вĕренекен А.Кузьминапа В.Габитова, Васанти Н.Павловпа Р.Смаева, Ярăславри З.Краснова, Хайпăлари М.Федорова, Кивĕ Шăмăршăри Г.Ларшниковпа С.Ястребов, Çĕнĕ Шăмăршăри Н.Стефинов, Энтĕрьелĕнчи Н.Тихоновапа И.Федорова, Пăчăрлă Пашьелĕнчи А.Гармонщиковпа Н.Угарина, Çĕнĕ Чукалти Н.Улюков тата ыттисем.
Пирĕн обществăлла корреспондентсем 2010 çулта та творчествăлла хастарлăхпа ĕçлесе пырасса, çак йыша хаçатăн çĕнĕ тусĕсем хутшăнасса шансах тăратпăр эпир.
2010 çула Раççей Федерацийĕн Президенчĕ Д.А. Медведев Учитель çулталăкĕ тесе палăртрĕ. Çавна май килес çул учительсен, шкулсен ĕçĕ-хĕлне анлăрах та туллинрех çутатма шутлать хаçат редакцийĕ. Вĕрентÿпе воспитани ĕçне кăтартакан материалсем тăтăш пичетленсе пырĕç. Пысăк хастарлăхпа тата педагогикăри çĕнĕ технологисемпе ĕçлесе пыракан учительсемпе çыхăннă статьясемпе тĕрленчĕксем сахал мар пулĕç хаçат страницисенче. Паллах, вăл е ку учителĕн юбилейне халалланă тĕрленчĕксем те кун çути курĕç.
Учительсем, вĕренекенсем шкул пурнăçне çутатакан статьясемпе заметкăсем редакцие ытларах çырса ярасса кĕтсех тăратпăр эпир. Учителĕн тĕрлĕ енлĕ пултарулăхне, çак профессин пысăк пĕлтерĕшне, вăл чи сумлисенчен пĕри пулнине, вĕрентекен йывăрлăхсене мĕнлерех çĕнтерсе пынине хаçатра çутатса пырасси килес çул редакци ĕçченĕсен тĕп тĕллевĕсенчен пĕри пулса тăрĕ.
РАЙОН ХАÇАТНЕ ВУЛАКАНСЕНЕ, ОБЩЕСТВĂЛЛА КОРРЕСПОНДЕНТСЕНЕ ÇЫВХАРСА ПЫРАКАН ÇĔНĔ – 2010 ÇУЛ ЯЧĔПЕ ĂШШĂН САЛАМЛАТПĂР, ЫРЛĂХ-СЫВЛĂХ, ТУЛЛИ ТЕЛЕЙ СУНАТПĂР.