13 января 2010 г.
ÇĔНĔ çулпа Раштав уявĕсене район çыннисем хаваслă ирттерчĕç. Шел пулин те, çак тапхăрта тÿнтерле пăтăрмахсем, преступленисем те пулса иртрĕç. Акă, декабрĕн 31-мĕшĕнче, çĕрле, Шăмăршăри Шоссейная урамри 8-мĕш çуртра пушар тухнă. Инкек сăлтавĕ – пушар хăрушсăрлăх йĕркисене пăхăнманни. Вăтам çулсенчи упăшкипе арăмĕ çунса-чыхăнса вилнĕ.
Çак каçах 42-ри арçын, малтан та судпа айăпланнăскер, Çĕнĕ Чукалти лавккана кĕнĕ, сутуçă айккинелле пăрăннă хушăра хăйĕн кĕсйине укçа пĕтĕрсе чикнĕ. Тÿнтерле факт тăрăх, РФ УКĕн 158 статйин 1 пайĕпе килĕшÿллĕн, уголовнăй ĕç пуçарнă.
Кăçалхи январĕн 5-мĕшĕнче, ирхине, «Мир» ЗАОн техника паркĕн (Палтиел) территорийĕнче хуралçăн сивĕннĕ ÿтне тупнă. Пенсионер, малтан алкоголь шĕвекĕсем ĕçнĕскер, шăнса вилнĕ.
Январĕн 6-мĕшĕнче Пăчăрлă Пашьел шкулĕнче – унта юсав ĕçĕсем пыраççĕ – Çĕнĕ Шупашкартан килнĕ 2 рабочи хирĕçсе кайнă. 1973 çулта çуралнă арçын харкашу вăхăтĕнче теприне хырăмран çĕçĕпе чикнĕ, ăна йывăр амантнă. Ку пуçтахăн, РФ УКĕн 111 статйин 2 пайĕпе килĕшÿллĕн, ответ тытма тивет.
Январĕн 9-мĕшĕнче, çĕрле, икĕ арçын Шăмăршăри Уруков урамĕнчи «Орион» лавккана çаратма шутланă. Вĕсем хыçалти алăка çĕмĕрсе кĕме хăтланнă, анчах та ĕç тухманнине кура, склад форточкине çĕмĕрсе шала кĕнĕ. Арçынсем бензопăчкăпа пĕчĕк телевизор, ĕç хатĕрĕсен комплектне – пурĕ 25 пин тенкĕлĕх – вăрласа тухнă. Оперативлă шырав мероприятийĕсем вăхăтĕнче вăрăсене тепĕр кунах тупса палăртнă. РФ УКĕн 158 статйин 2 пайĕпе килĕшÿллĕн, вĕсен ответ тымалла пулать. Шутламасăр тунă ĕç кайран ĕнсене кăтăр-кăтăр хыçтарать çав.