13 января 2010 г.
ПУЯНКАССИНЧИ пĕтĕмĕшле пĕлÿ паракан тĕп шкулта хĕллехи каникул вăхăтĕнче лагерь ĕçлерĕ. «Йăл-кулă» ятлăскере 15 ача çÿрерĕ. Вĕренекенсем ÿкерчĕксен конкурсне, Çĕнĕ çул юррисен тупăшăвне хутшăнчĕç, уçă сывлăшра йĕркеленĕ ăмăртусенче вăй виçрĕç, сĕтел çи вăййисем ирттерсе хăйсен ăсталăхне кăтартрĕç.
Ачасен канăвне асра юлмалла йĕркелес ĕçе ялти тĕслĕх библиотекин заведующийĕ Н.Федотова та хутшăнчĕ. Вăл кашни кунах тĕрлĕ мероприяти ирттерчĕ, елка йĕркелерĕ, лагере çÿрекен шкул ачисене Çĕнĕ çулпа, Раштавпа çыхăннă вăйă-викторинăна явăçтарчĕ. Ют çĕршывсенче çак уявсене еплерех паллă туни пирки каласа кăтартрĕ, çавăнпа пĕрлех ташă-дискотекăра ташласа савăнни вĕренекенсен кăмăлне çĕклерĕ. Конкурс çĕнтерÿçисене Н.Федотова пылак парнепе хавхалантарчĕ.
Çичĕ куна тăсăлнă лагерьте шкул ачисене З.Мресова поварпа М.Петрова кухня ĕçченĕ тутлă апатпа сăйларĕç. Каникул кăсăклă иртнишĕн вĕренекенсем савăнчĕç, малашне те çакăн пек кану йĕркелеме ыйтаççĕ.