20 января 2010 г.
ВИÇПŸРТ ШĂМĂРШĂРИ тĕп шкул ачисен шухăшĕпе, Çĕнĕ çула хатĕрленсе кĕтсе илни питĕ килĕшнĕ. Аслă класра вĕренекенсем (саккăрмĕшсем) çак кăмăллă ĕçе хăйсен аллине илнĕ: уяв программине йĕркелессине, лотерея билечĕсен вăййине ирттерессине, тĕрлĕ парнесем туянассине, классене юмахри пек капăрлатассине, стена хаçачĕсем кăларассине – пурне те хăйсене тата курма килнĕ çынсене килĕшмелле хатĕрленĕ. Уява та ачасемех ертсе пычĕç. Аслисем жюри членĕсем пулчĕç, тĕрлĕрен конкурссене тишкерчĕç.
Кĕтнĕ уява ачасем пурте тĕлĕнмелле çи-пуçпа килнĕ. Кунта Çĕнĕ çул хуçи Тигр (М.Семенова), Клоун (М.Ухтиярова), Лĕпĕш (Д.Семенова), Чăваш инки (П.Савельев), Мушкетерсем (К.Маловпа В.Егоров) тата нумай ачасем хăйсем ăсталанă костюмсемпе пурне те килĕшрĕç.
Чи илемлĕ хĕллехи асамлă пÿлĕм – 6, 7 классен. Хаçат кăларассипе 8, 5 классем маттуртарах пулчĕç.
Шкул ачисен шучĕ йышлах мар пулин те, 2 вĕренÿ отличникĕ (М.Семенова тата К.Алюкова), 13 вĕренекен «4» «5» паллăсемлĕх ăс пуçтараççĕ.
Çĕнĕ çул çÿллĕ шайра иртни А.А.Семенов учитель спонсор пулса хутшăннинчен те килчĕ. Тавах ăна ачасенчен, ашшĕ-амăшĕсенчен.
Каникул вăхăтĕнче пирĕн шкул кану çурчĕ пулса тăчĕ. Кунта хĕллехи канупа сывлăха çирĕплетмелли «Юр кĕлетке» («Снеговик») лагерь уçнă. «Сире кунта мĕн килĕшет; – тесе ыйтсан, – Пире кунта пурте килĕшет. Тулта ирттерекен гимнастика та, ырă кăмăллă повар Валя аппа пĕçернĕ тутлă апат та, вожатăйсем кашни кун тĕрлĕрен ĕçсем, вăйăсем ирттерни те», – терĕç ачасем. Кружоксем ĕçлени те усăллă канма ма й парать.
Пĕлсе йĕркеленĕ каникул – чи усăллă кану.