20 января 2010 г.
ÇĔНĔ ÇУЛ умĕнхи декабрь уйăхĕ Шăмăршăри ачасемпе çамрăксен спорт шкулĕн воспитанникĕсемшĕн тĕрлĕ спорт ăмăртăвĕсемпе палăрса юлчĕ. Шкул командисен республикăри Спартакиадине хутшăнса, ирĕклĕ майпа кĕрешес енĕпе пирĕн команда 2009 çулхи ноябрьте 2-мĕш вырăн çĕнсе илчĕ. Декабрьте иртнĕ иккĕмĕш тапхăрта вара Шăмăршăсен команди виççĕмĕш вырăн йышăнса, республикăри хуласемпе районсенчи 28 команда хушшинче чи вăйлисенчен пĕри пулса тăчĕ.
Кире пуканне çĕклекенсен районти команди Спартакиадăн пĕрремĕш тапхăрĕнче виççĕмĕш вырăна тухнăччĕ, иккĕмĕш тапхăрĕнче вара вăл 5-мĕш пулчĕ. Уйрăммăн, хăйсен зачечĕпе, Андрей Саминов – 2-мĕш, Николай Денисов – 3-мĕш, Петр Копылов 4-мĕш (Пăчăрлă Пашьел шкулĕ, тренерĕ Е.Укин), Марс Ситдиков (Шăмăршă шкулĕ) 3-мĕш вырăнсене пайларĕç.
Декабрьтех Ульяновск хулинче СССР спорт мастерĕн В.Столяровăн призĕсене çĕнсе илессишĕн самбо мелĕпе кĕрешекенсен облаçри уçă турнирĕ иртрĕ. Унта хутшăнса, 68 килограмм таранчченхи виçеллисем хушшинче Анатолий Хафизов 3-мĕш вырăна тухма пултарчĕ.
Çĕнĕ Шупашкарта Совет Союзĕн Геройĕн В.Винокуровăн призĕсене илессишĕн йĕркеленĕ дзюдо кĕрешĕвĕн республикăри уçă турнирĕнче Шăмăршăри вăтам шкулта вĕренекен Александр Юнкеровпа Анатолий Хафизов – 2-мĕш, Евгений Кузьмин 3-мĕш вырăнсене йышăнчĕç. 1999-2000 çулсенче çуралнă арçын ачасем хушшинче Çĕнĕ Шупашкарта ирттернĕ дзюдоистсен уçă турнирĕнче Шăмăршăри вăтам шкулта вĕренекен Дмитрий Галкинпа Михаил Попов – 1-мĕш, Максим Юнкеров – 2-мĕш, Руслан Кудряшов виççĕмĕш вырăнсене çĕнсе илчĕç.
Хĕл Мучин призĕсене илессишĕн пынă самбистсен республикăри турнирĕнче А.Филиппов тренерăн воспитанникĕсем лайăхпа палăрчĕç. Шупашкарта иртнĕ çак ăмăртура Руслан Алексеев – 1-мĕш, Артем Егоровпа Иван Филиппов 3-мĕш вырăнсене тухрĕç.