06 февраля 2010 г.
ФЕВРАЛĔН 2-мĕшĕнче Шăмăршăри культура аталанăвĕн центрĕнче Учитель çулталăкĕ пуçланнине халалланă пысăк мероприяти иртрĕ. Унта районти шкулсенчи учительсем йышлăн килсе çитрĕç.
– Кăçал январĕн 29-мĕшĕнче пирĕн республикăра Учитель çулĕ старт илчĕ, – терĕ уява уçса район пуçлăхĕ В.П.Фадеев. – Паян, акă, вăл пирĕн районта пуçланнине палăртма пуçтарăнтăмăр эпир.
Валерий Петрович районти шкулсен пурлăх никĕсĕ çулсерен çирĕпленсе пынине, тĕрлĕ оборудованипе, сĕтел-пуканпа пуянланнине, шкулсене Интернет сетьĕпе çыхăнтарнине, районти пур яла та асфальтлă çулпа çитме май пуррине, çавна май ачасене никĕс шкулсене автобуссемпе турттарма меллĕ пулнине асăнчĕ. Юлашки çулсенче Раççей шайĕнчи наградăсене тивĕçнĕ пултаруллă учительсене ятран палăртнă хыççăн район пуçлăхĕ Шăмăршăри вăтам шкулта чĕрĕк ĕмĕре яхăн вăй хуракан Г.Н.Веденеевана Мускав наградине – Раççей Федерацийĕн Вĕрентÿпе наука министерствин Хисеп грамотине парса чысларĕ. Палтиелĕнчи вăтам шкулта 11 класра вĕренекен Алена Кузьмина отличница вара, обществăлла ĕçсенче те хастарлăхпа палăрса тăраканскер, Раççей Федерацийĕн талантлă çамрăкĕсен премийĕн лауреат Дипломне тата творчествăлла ăнтăлушăн 2010 çулта Чăваш Республикин Президенчĕн стипендине парса тăма йышăннине çирĕплетекен Свидетельство илчĕ. Çак шкулта 11 класра вĕренекен Венера Габитова, Шăмăршă вăтам шкулĕнче 11 класра вĕренекен Екатерина Муромцева, Анат Чаткас ял поселенийĕн çамрăксемпе ĕçлекен Канашĕн членĕ Мария Капралова та çакнашкал Свидетельствăна тивĕçрĕç.
Наградăсем панă хыççăн В.П.Фадеев Учительсен çулĕнче педагогсене йывăр та пархатарлă ĕçре ăнăçу сунчĕ, Шăмăршăри вăтам шкулта 22 çул акăлчан чĕлхине вĕрентекен учительницăна, Раççей Федерацийĕн Президенчĕн 2009 çулхи грантне çĕнсе илнĕ С.Г.Жилкинана сăмах пачĕ.
Пухăннисене шкулсен пултарулăх коллективĕсем, уйрăм солистсем пысăк концертпа савăнтарчĕç. Мероприяти программине В.Б.Мартыновпа И.А.Харитонова учительсем интереслĕ ертсе пычĕç.