06 февраля 2010 г.
«2010 ÇУЛТА Чăваш Енре «ешĕл революци» старт илет», – тенĕ Чăваш Республикин Президенчĕ Н.В.Федоров Патшалăх Канашне янă Çырура.
Николай Васильевич Чăваш Республики Раççейри пĕрремĕш биорегион пулмалла тесе шутлать. Пирĕн экологи тĕлĕшпе таса çимĕç кăна туса илме тытăнмалла, çапла майпа халăх сывлăхне çирĕплетме, анлă рынока тухма пултарăпăр.
«Био» чĕрĕ, сиенсĕр, таса тенине пĕлтерет, çĕрпе, шывпа, ÿсен-тăран, чĕр чун тĕлĕшпе тачă çыхăннă. Çын хăй те – «био» пайĕ. Çут çанталăк унăн пурнăçĕнче пысăк вырăн йышăнать: сывлатпăр, апат-çимĕç, тумтир хатĕрлетпĕр... Турă панă пуянлăхпа усă куратпăр. Ку таранччен хăнăхнă меслетсемпе пурăннă. Çавна пула экологи сывă мар, заводсем, транспорт сывлăша варалаççĕ, чир-чĕртен хăпаймастпăр.
Малашне кунашкал пурăнма юрамасть. Этемлĕхĕн çĕнĕ улшăнусен, нано–, биотехнологисен тапхăрне куçмалла.
Биотехнологи – производство тухăçлăхне ÿстерес, пысăк пахалăхлă, таса çимĕç туса илес, çав вăхăтрах экологи лару-тăрăвне лайăхлатас тĕллевпе ÿсен-тăран, чĕр чун, микроорганизм тĕрлĕлĕхне хушăнтарма вĕсен генетикине çĕнетсе пыни.
Тĕнчери нумай çĕршыв биотопливо çине куçасшăн. Вăл атмосферăна вараламасть. Экологи сывалĕ, халăх чирлесси чакĕ.
Шел пулин те, пирĕн хальлĕхе çĕнĕлле шухăшласа пăхакан специалист сахал. Малашлăх – çамрăксенче. Çавăнпа вĕсене нано-, био çинчен шкултанах вĕрентме тытăнмалла, учебниксем кăлармалла.