10 февраля 2010 г.
РАÇÇЕЙ ФЕДЕРАЦИЙĔН Президенчĕн Д.А.Медведевăн Указĕпе 2009 çула Раççейри Çамрăксен çулталăкĕ тесе палăртнăччĕ. Унпа килĕшÿллĕн район администрацийĕн вĕрентÿ, çамрăксен политикин тата культура пайĕ мероприятисен анлă планне туса хатĕрленĕ. Çамрăксене, çул çитменнисене гражданла тата патриотла воспитани парассипе, вĕсен творчествăлла пултарулăхне, ăс-хакăлне, тавракурăмне малалла аталанма пулăшакан социаллă пĕлтерĕшлĕ мероприятисем районта пĕлтĕр тăтăш иртрĕç. Февралĕн 5-мĕшĕнче Шăмăршăри культура аталанăвĕн центрĕнче Çамрăксен çулталăкĕн ĕç-хĕлне пĕтĕмлетрĕç, уйрăмах палăрнисем наградăсем илчĕç.
Ял поселенийĕсенче, предприятисемпе организацисенче, учрежденисенче çамрăксемпе лайăх ĕçлесе пырас тĕлĕшпе йĕркеленĕ районти конкурсра Кивĕ Чукал ял поселенийĕн Çамрăксемпе ĕçлекен Канашĕ пĕрремĕш вырăн йышăннă май, райадминистрацин вĕрентÿ, çамрăксен политикин тата культура пайĕн начальникĕ Н.Г.Игнатьева ăна район администрацийĕн Хисеп грамотипе тата 5 пин тенкĕ укçа премийĕпе чысларĕ. Иккĕмĕш вырăн йышăннă Шăмăршă ял поселенийĕн Çамрăксен канашĕ Хисеп грамотипе 3 пин тенкĕ преми, виççĕмĕш вырăна тухнă Анат Чаткаспа Карапай Шăмăршă ял поселенийĕсенчи Çамрăксен канашĕсем Хисеп грамотисемпе 2-шер пин тенкĕ премисем илчĕç. Васан ял поселенийĕпе районти тĕп больница райадминистрацин вĕрентÿ, çамрăксен политикин тата культура пайĕн Тав çырăвĕсене тивĕçрĕç.
«Çамрăксен чи лайăх наставникĕ» район конкурсĕнче палăрса, Чукалти С.И.Симурзин фермера, Шăмăршă вăтам шкулĕнче 35 çул ытла ĕçлекен ЧР тава тивĕçлĕ учительне Н.А.Куприянова, Васанти шкулта 30 çул ытла тăрăшакан О.В.Антонова педагога та Тав хучĕсемпе хисеплерĕç. Карапай Шăмăршă ял поселенийĕ – çамрăк çемьесемпе ĕçлессипе, Шăмăршă вăтам шкулĕ – çамрăксене ĕçе явăçтарассипе тата çамрăк армеецсен юхăмне аталантарассипе, Карапай Шăмăршă вăтам шкулĕ – патриотла воспитани парассипе, Палтиел вăтам шкулĕ, унти ачасен «Туслăх» организацийĕ ирĕклĕх тата ачасен юхăмне сарассипе лайăх ĕçленĕшĕн Тав çырăвĕсене тивĕçрĕç.