13 февраля 2010 г.
ÇАМРĂКСЕМ яла юлччĕр, çĕр çинче "тымар яччĕр" тесен, вĕсене чăн малтан професси суйласа илме пулăшмалла. Шăпах çак пысăк пĕлтерĕшлĕ задачăна пурнăçласа пырать те ĕнтĕ Кÿкеçри вĕренÿпе курс комбиначĕн Шăмăршăри филиалĕ. Кунта ял хуçалăхĕнче кирлĕ профессисене вĕрентеççĕ, çамрăксене пысăк опытлă преподавательсем тарăн пĕлÿ парассишĕн тăрăшаççĕ.
Иртнĕ кунсенче çеç-ха кунта тракторист-машинистсен черетлĕ кăларăмĕ пулчĕ. Филиал ертÿçи В.Н.Кириллов выпускниксен пĕлĕвĕпе кăмăллă пулнине пĕлтерчĕ.
– Уйрăмах Наиль Басыров, Александр Кокуркин, Александр Егоров, Сергей Фадеев, Анатолий Кузьмин, Данис Ибрагимов техника тытăмне тата çул-йĕр правилисене тĕплĕн пĕлни курăнчĕ, – терĕ Валерий Николаевич. – Вĕсене паян тесен паянах трактор е комбайн шанса пама пулать.
Çапла вара, çĕр ĕçченĕсен йышне тата 15 çамрăк йĕкĕт хутшăнчĕ. Вĕсене филиал ертÿçи В.Н.Кириллов, Н.В.Володин, О.В. Кириллов преподавательсем тата В.М.Филиппов мастер, Гостехнадзорăн районти аслă инспекторĕ В.А.Захаров çак савăнăçлă кунпа ăшшăн саламларĕç, ĕçре тата пурнăçра ăнăçу сунчĕç.
Сăмах май, тракторист-машинист пулас кăмăллисен тепĕр ушкăнĕ те вĕренме пуçланă. Филиалта газооператорсемпе электрогазосварщиксене те вĕрентсе хатĕрлеççĕ. Хамăр район çамрăкĕсемсĕр пуçне, кÿршĕллĕ Тутарстанпа Патăрьел районĕнчен те вĕренме çырăннă.