13 февраля 2010 г.
АВТОР шутласа кăларнă сăмахсем мар кусем – Шупашкартан каялла тăван яла, Çĕнĕ Чукала куçса килнĕ С.Степанов шăпах çапла калать. Çамрăк мăшăр – Сергейпа Ирина – малашнехи пурнăçра кунтах тарăн тымар яма шутланине ырламалла кăна. Малтанласа пĕчĕк çурт çеç лартма вăй çитернĕ вĕсем, анчах çакăнпа çеç çырлахасшăн мар. Степановсем пысăкрах çурт-йĕр лартас тата хуралтăсем çавăрас тĕллевпе пурăнаççĕ.
Дмитрий Макеев та, çемье çавăрсан, ют çĕрте телей шырас темен. Асатте-асаннесем пурăннă, атте-аннесем пурăнакан вырăнтан хакли мĕн пултăр; Улми улмуççинчен аякка ÿкмест тени тĕрĕсех çав. Ÿркенмест çамрăк çемье – картиш тулли выльăх-чĕрлĕх тытать, çурт лартма тенкĕ çумне тенкĕ пухма тăрăшать. Дмитрий инçете кайса ĕçлесе килме те ÿркенсе тăмасть, мăшăрĕ те килте ахаль лармасть.
Анатолий Ергунов та çамрăк-ха, çавах пурнăçра хăйĕн вырăнне тупнă темелле. Анатолий уйрăм çын предприятине йĕркеленĕ, магазин уçнă, çынсене ĕç вырăнĕсемпе тивĕçтерет.
С.Симурзин предприниматель пирки те ыррине кăна каламалла. Маларах физкультура учителĕ пулса ĕçленĕскер, халĕ те спортран уйрăлмасть. Ялти хоккей коробкине те вăлах тытса тăрать, юсав ĕçĕсене те хăйĕн вăйĕпех йĕркелет. Тĕрлĕрен ăмăртусен спонсорĕ те вăл, хăй те – ăста хоккеист.
Сергей Иванович – физкультурăпа спортшăн хыпса çунакан çын. Ачасемпе тăтăшах тренировкăсем ирттерет вăл. С.Симурзин тăрăшнипех юлашки çулсенче ял поселенийĕнче хоккей вăййи уйрăмах пысăк вăй илчĕ темелле: чукалсем районти ăмăртусенче те ялан тенĕ пекех призлă вырăнсене йышăнаççĕ.
Сергейпа унăн мăшăрĕн Светланăн ялта хăйсен магазинĕ те пур.
Çакăн пек ĕçчен çемьесем пурри тăван яла илем кÿрет, унăн малашлăхĕ уçăмлине çирĕплетет.