17 февраля 2010 г.
2009 ÇУЛ хыçала юлчĕ пулин те, çулталăкри ĕç кăтартăвĕсем калаçтараççĕ-ха. Районăн социаллă пурнăçĕпе экономики мĕнлерех аталаннине тишкерсе тухас пулсан, ÿсĕмсемпе пĕрлех хăш-пĕр çитменлĕхсене те асăрхатăн.
Çулталăк тăршшĕнче район промышленноçĕ 14174 пин тенкĕлĕх е 2008 çулхинчен 19 процент нумайрах продукци туса кăларнă.
«Чăваш вăрман хуçалăхĕ» ГУПра ÿсĕм уйрăмах палăрать: промышленноç продукцийĕ туса кăлармалли план кăтартăвĕсене 113 процент тултарнă. «Саид» ООО 2324 пин тенкĕлĕх пиломатериал хатĕрленĕ, ку кăтарту унчченхи çулхинчен 41,3 процент пысăкрах.
Л.Корчаков предприниматель 200 тонна çăкăр-булка продукцийĕ кăларнă, пекарьнăра батон пĕçерсе хатĕрлекен линие хута янă.
Пилорама тытакан уйрăм предпринимательсем те тухăçлă ĕçлени курăнать: халăха 3610 кубометр хăма çурса панă.
2009 çулта Шăмăршăра «Тандер» ЗАО суту-илÿ лаптăкĕ 500 тăваткал метр йышăнакан «Магнит» магазин, Кивĕ Шăмăршăра Н.Кудряшов предприниматель «Апат-çимĕç продукчĕсем» магазин, çак ялти К.Усонов предприниматель «Стройхозтовары» магазин, Палтиелĕнче Чăвашпотребсоюз куллен кирлĕ таварсем сутакан магазин, Шăмăршăра А.Быков предприниматель сĕтел-пукан тăвакан цех, А.Н.Михайловпа Е.Н.Ильичева предпринимательсем парикмахерски уçнă.
2010 çулта район промышленноçĕн 16740 пин тенкĕлĕх продукци туса кăлармалла. «Агросервис» ООО производство калăпăшне икĕ хут ÿстерме палăртнине ырламалла кăна.
Ял хуçалăхĕ мĕнле аталаннă-ха; «Мир» ЗАОра ял хуçалăх продукцийĕ туса кăларасси 25, «Карлинская» Агрофирма» ЗАОра 24,2, «Шанс» ОООра 17,7, «Исток» ОООра 4,6, «Искра» СХПКра 3,5 процент ÿснĕ, çав вăхăтрах «Восход» СХПКра – 7, «Колос» Агрофирма» ЗАОра – 33, «Нива» ЗАОра – 20, «Агродор» ОООра – 33, «Агросервис» ОООра 25 процент чакнă.
Пур категорири хуçалăхсем те унчченхи çулхипе танлаштарсан аш-какай ытларах – пĕтĕмпе вара 3680 тонна туса илнĕ.
Çав вăхăтрах сĕт туса илесси 3,5 процент чакнă, пĕтĕмпе 16631 тонна хатĕрлесе панă. Килти хушма хуçалăхсем сĕт туса илессине 6 процент чакарнă.
2010 çулхи январĕн 1-мĕшĕ тĕлне мĕнпур категорири хуçалăхсенче 6804 пуç мăйракаллă шултра выльăх, 8965 пуç сысна, 721 пуç лаша, 4146 пуç сурăхпа качака шутланнă.
2009 çулта мĕнпур категорири хуçалăхсем 23,055 пин тонна тырă, 34,3 пин тонна çĕр улми, 2400 тонна пахча-çимĕç туса илнĕ.
Çулталăк тăршшĕнче 388 çемье килти хушма хуçалăха аталантарма патшалăхран 58359 пин тенкĕ çăмăллăхлă кредит илнĕ.
2009 çулта районта пурăнмалли лаптăкĕ 16000 тăваткал метр йышăнакан çурт-йĕрсем хута янă (100 проц.), нумай хваттерлĕ 14 çурта (14879 пин тенкĕлĕх) тĕпрен юсанă. Шăмăршăри Ленин урамĕнче 24 хваттерлĕ çурт хута кайнă. Районти тĕп больницăн хирурги уйрăмне реконструкцилесе поликлиникăпа терапи уйрăмне уçнă (пĕтĕмĕшле хакĕ 57,769 миллион тенкĕлĕх, çав шутра çĕнĕ медицина оборудованийĕ туянма 5443 пин тенкĕ уйăрнă).
Пăчăрлă Пашьелĕнчи вăтам шкул çуртне (1148,1 пин тенкĕ), Культура çуртне (603,8 пин тенкĕ), пĕтĕмĕшле врач практикин офисне (1903 пин тенкĕ) тĕпрен юсанă.
Район халăхĕн нушисене татса парас тĕллевпе коммуналлă хуçалăх валли ятарлă техника – мусоровоз (1152,2 пин тенкĕ), экскаватор-погрузчик (888 пин тенкĕ) туяннă.
2009 çулта пур шайри бюджетсене 52562 пин тенкĕ налуксемпе сборсем кĕнĕ, ку кăтарту 2008 çулхи шайран 9,4 процент пысăкрах.