17 февраля 2010 г.
ШĂМĂРШĂРИ плотина çинче «Раççей йĕлтĕр йĕрĕ» спорт уявне палăртма тата Çăварние ăсатма халăх йышлă пухăнчĕ. Раççей пĕлтерĕшлĕ спорт мероприятийĕ иртнĕ май, йĕлтĕрçĕсем те питĕ нумайăн килсе çитрĕç кунта.
Кĕске сăмах каласа уява Шăмăршă ял поселенийĕн пуçлăхĕ В.К.Андронов уçрĕ. Вăл халăха спорт уявĕ тата Çăварни праçникĕ ячĕпе ăшшăн саламларĕ, яланах пĕр-пĕрне хисеплесе пурăнма тата каçарма сĕнчĕ, спортсменсене стартра ăнăçу сунчĕ, спорт ветеранне Владимир Шурякова сăмах пачĕ. «Спорт сывлăх çăл куçĕ, – терĕ вăл. – Унпа туслă пурăнсан, ÿт-пĕве пиçĕхтерсе тăрсан чир-чĕрсем те çыпăçаймаççĕ. Спорт пирĕн ÿт-пĕве çирĕплетет, йывăрлăхсене çĕнтерсе пыма хавхалану кÿрет. Ăмăртура ачасене те, çитĕннисене те ăнăçу сунатăп». Малалла вара ăмăртусен тĕп судйи Н.А.Куприянов сăмах илчĕ, стартри условисемпе паллаштарчĕ.
Чи малтанах старта Шăмăршăри вăтам шкулта 1-3 классенче вĕренекенсем тăчĕç. Чи хĕрринче тăракан Владислава Смирновапа калаçу пуçартăм.
– Эпĕ 2 «б» класра вĕренетĕп, – терĕ спорт формиллĕ хĕрача. – Хамăрăн учительница А.Г.Мулендеева ăмăртăва хутшăнма сĕнсен эпĕ хаваспах килĕшрĕм. Мана йĕлтĕрпе ярăнма, ыттисемпе ăмăртма питĕ килĕшет. Манпа юнашар стартра тăракансем – Кристина Давыдова, Арина Антонова, Юрий Кузьмин тата Никитиа Кузнецов. Эпир пĕр класра вĕренетпĕр.
Пĕчĕккисем 1000 метрлă дистанцире ăмăртрĕç. Арçын ачасем хушшинче – Владик Старшов, хĕрачасем хушшинче Маргарита Яковлева пĕрремĕш вырăнсене тухрĕç. Владик Горбуновпа Виктория Матвеева – иккĕмĕшсем, Александр Тускаевпа Жанна Чамеева виççĕмĕшсем пулчĕç.
4-6 классенче вĕренекенсен ăмăртăвне те халăх интересленсе пăхрĕ. Çак ÿсĕмри арçын ачасем хушшинче – Андрей Хафизов, хĕрачасем хушшинче Вера Удина пĕрремĕш вырăнсене тухрĕç. Илья Хлюкинпа Татьяна Сергеева – иккĕмĕш, Михаил Ефимовпа Алена Львова – виççĕмĕш вырăнсенче.
7-8 классенче вĕренекенсем 1500 метрлă дистанцире вăй виçрĕç. Кунта Павел Драгуновпа Оля Кадеева – пĕрремĕш, Дмитрий Ефимовпа Ирина Петрова – иккĕмĕш, Михаил Драгуновпа Анастасия Мердеева виççĕмĕш вырăнсене йышăнчĕç.
9-11 классенче вĕренекенсен ăмăртăвĕсем хĕрÿрех те интереслĕрех иртрĕç. Йĕлтĕр спортне кăмăллакансем хăйсен ăсталăхне уйрăмах уççăн кăтартма пултарчĕç. Яшсем – 4500 метрлă, хĕрсем 3000 метрлă дистанцисенче тупăшрĕç. Алексей Глазковпа Ирина Угарина – пĕрремĕш, Михаил Глазковпа Алина Ларионова – иккĕмĕш, Анатолий Хафизовпа Татьяна Васильева виççĕмĕш вырăнсене çĕнсе илчĕç.
Ăмăртусене вĕçлесе, старта çитĕннисем тăчĕç. Предприятисенче, организацисенче тата учрежденисенче вăй хуракансем, ял поселенийĕн спортсменĕсем 1500 метрлă дистанцире ăмăртрĕç. Ыттисене чылай кая хăварса, Раççей спорт мастерĕ Владимир Шуряков финиша пуринчен те маларах çитрĕ. Игорь Поляковпа Вячеслав Тимофеев иккĕмĕшпе виççĕмĕш вырăнсене йышăнчĕç. Хĕрарăмсем хушшинче призлă вырăнсене Марина Удина, Светлана Харитонова тата Елизавета Шумилова пайларĕç.
Çĕнтерÿçĕсем Грамотăсене тивĕçрĕç, укçа призĕсене илчĕç.
9 «Б» класс (руководителĕ В.Б.Мартынов) тата районти тĕп больница ăмăртусене пысăк йышпа хутшăннине те палăртрĕ судьясен коллегийĕ. «Раççей йĕлтĕр йĕрĕ» спорт уявĕнче пурĕ 550 йĕлтĕрçĕ ăмăртрĕ.
Чăвашпотребсоюз пĕрлешĕвĕн Шăмăршăри подразделенийĕн ĕçченĕсем уява пухăннă халăха Çăварни икерчисем, тутлă шашлăк, кукăльсем, вĕри чей, ытти çимĕçсем сĕнчĕç.