20 февраля 2010 г.
ПАЛТИЕЛĔНЧИ Равиль Хакимов малтан çар çыннин профессийĕ пирки шутламан та. 2004 çулхи февральте вăтам шкулта 11 класра вĕренекен яш районти призыв комиссийĕ витĕр тухнă. Çар комиссариачĕн работникĕ Владимир Денисов яштака пÿллĕ, илемлĕ сăн-питлĕ, шкулта питĕ лайăх паллăсемпе вĕренсе пыракан çамрăка çар училищине вĕренме кайма сĕннĕ, унта кĕмелли условисемпе паллаштарнă, офицерăн йывăр, çав вăхăтрах романтикăлла службине сăнлакан хитре иллюстрацисем кăтартнă. Равиле хăйне те офицер форми питĕ килĕшнĕ пулнă-ха, çар профессине суйласа илнĕ выпускниксем шкулти тĕл пулусенче хăйсен служби çинчен каласа панине пĕр сăмах сиктермесĕр тимлĕн итленĕ, вĕсене кăштах ăмсаннă та. Аслă прапорщик сĕнĕвĕ каччăн чун-чĕринче çутă ĕмĕт çуратнă.
Киле таврăнсан Равиль ашшĕпе амăшне Ульяновскри аслă çыхăну çар училищине вĕренме каясси пирки пĕлтернĕ. Палтиелĕнчи вăтам шкулта педагог пулса вăй хуракан Ферхать Гарефетдиновичпа Сания Касимовна хăйсен ывăлĕн шухăшне ырланă, Тăван çĕршыв хÿтĕлевçин профессийĕ чи сумлисенчен пĕри пулнине палăртнă.
2004 çулта вăтам шкула «Питĕ лайăх» тата «лайăх» паллăсемпе пĕтерсен Равиль Хакимов Ульяновскри аслă çыхăну çар училищинче экзаменсене ăнăçлă тытса, пысăк конкурс витĕр тухса курсант пулса тăнă. Училищĕре лайăх паллăсемпе вĕренсе пынипе пĕрлех, шкулта илнĕ спортăн тĕрлĕ енлĕ хăнăхăвне малалла аталантарнă. Вăл вылякан баскетбол, футбол, волейбол командисем облаçри ăмăртусенче темиçе хутчен те призерсен йышне кĕнĕ.
Çар реформисене пула Ульяновскри училищĕне хупсан, 2008 çулта, курсантсене Ставропольти çыхăну çар институтне вĕренме куçарнă. 2009 çулхи июльте институт начальникĕ Равиле тата унпа пĕрле вĕреннĕ курсантсене Раççей Оборона министрĕ лейтенант званийĕ пани çинчен приказ вуласа панă.
Равиль Хакимов лейтенант Мускав çар округне службăна кайма назначени илнĕ. Унта ăна патшалăх пĕлтерĕшлĕ икĕ çар учрежденине çыхăнупа тивĕçтерекен службăн çар инженерĕн – пай начальникĕн çумĕн должноçне шанса панă. Палтиел çамрăкĕ хăйĕн служба тивĕçне чыслăн пурнăçлать, хăйĕнчен те, ыттисенчен те çирĕп ыйтать. Ахальтен мар ĕнтĕ ăна çар командованийĕ тав тунă, укçа премийĕпе хавхалантарнă.