26 февраля 2010 г.
1993-1995 çулсенче çар службинче пулнă хыççăн Ярăславри Александр Краснов районти шалти ĕçсен пайне ĕçлеме килнĕ.
Каччăн право хуралĕнчи биографийĕ çул-йĕр патруль службинче пуçланнă. Паянхи кун та вăл милицин тĕрĕслев постĕнче вăй хурать. Инспектор ĕçре тăрăшулăхпа палăрса тăрать. Александр Краснов постра Алексей Еремеев аслă лейтенантпа тата Павел Петров лейтенантпа пĕрле дежурствăра тăрать. Инспекторсем пĕр-пĕрне ăнланса тата килĕштерсе ĕçлеççĕ. Ку, паллах, вĕсене службăра хăш-пĕр ÿсĕмсем тума май парать.
Александр Краснов заочнăй майпа пĕлтĕр юридицин аслă пĕлĕвне илнĕ.
Хăйĕн тивĕçне яланах тÿрĕ кăмăлпа пурнăçланăшăн милици кĕçĕн лейтенантне Александр Краснова виççĕмĕш степеньлĕ «Службăра палăрнăшăн» медальпе, «Милици отличникĕ» знакпа наградăланă. Кунсăр пуçне ăна шалти ĕçсен пайĕн начальникĕ хăйĕн приказĕпе темиçе хутчен те тав тунă, укçа премийĕсемпе хавхалантарнă.