03 марта 2010 г.
ЮЛАШКИ çулсенче çамрăксем контракт йĕркипе çар службине ытларах та ытларах кайма пуçларĕç. Хальхи вăхăтра кашнийĕн валли килĕштернĕ ĕç тупăнсах каймасть. Ĕç çук – укçа та çук. Ку вара çамрăка моральпе психологи тĕлĕшĕнчен пысăк сиен кÿрет. Раççейри çар службинче вара вăтам пĕлÿллĕ, çирĕп сывлăхлă кашни йĕкĕт валли ĕç тупăнать. Нумай чухне чун килĕштернĕ должнăçа та суйласа илме пулать. Анчах та малтан, паллах, çар специальноçне алла илмелле.
Чăваш Республикин çар комиссариачĕн Патăрьелпе Шăмăршă районĕсен пайĕ хальхи вăхăтра Рязань хулинчи вĕренÿ центрне вĕренме кайма кандидатсем пуçтарать. 19 çултан пуçласа 35 çул таранчченхи çамрăксен çирĕп сывлăхлă, вăтам пĕлÿллĕ пулмалла, çÿллĕшĕ – 170 сантиметртан кая мар. Çак центрта çамрăксене ятарлă вăтам пĕлÿ илнине çирĕплетекен диплом тата сержант званийĕ параççĕ. Вĕренĕве вĕçлесен, илнĕ специальнăçпа килĕшÿллĕн, вĕсен 5 çуллăха çар службинче тăма контракт çырмалла.
Çар центрĕнче ятарлă вăтам пĕлÿ панă май, унта кĕме вырăс чĕлхипе, математикăпа, физикăпа, физкультурăпа тата физкультура хатĕрленĕвĕпе тĕрĕслев витĕр тухмалла.
Вĕреннĕ вăхăтра кашни уйăхра 20 пин тенкĕ тÿлесе тăраççĕ. Вĕренÿре мĕнлерех ĕлкĕрсе пынине кура, кунсăр пуçне 5 пин тенкĕрен пуçласа 15 пин тенкĕ таран хушса тÿлеççĕ. Центрта 2 çул та 10 уйăх вĕренмелле.
Вĕренĕве вĕçлесен, контракт службине пуçласан, çамрăксем 35 пин тенкĕ ĕç укçи илеççĕ, хăтлă общежитире пурăнаççĕ.
Кăмăл тăвакансене Чăваш Республикин çар комиссариачĕн Патăрьелпе Шăмăршă районĕсен пайне (Патăрьел ялĕ, Ленин пр., 24 çурт) килме сĕнетпĕр.