10 марта 2010 г.
ШĂМĂРШĂРИ плотина çинче нумаях пулмасть иртнĕ районти çамрăк армеецсен слетне 11 шкулти 2 патриот-клуб тата 9 отделени хутшăнчĕ.
Мероприятие кĕске сăмах каласа Чăваш Республикин çар комиссариачĕн представителĕ В.Н.Фадеев капитан уçрĕ. Вăл çакнашкал çар вăййисен пĕлтерĕшĕ çав тери пысăк пулнине, ачасене патриотла воспитани парассинче, яшсене çар ретне тăма хатĕрлессинче сисĕмлĕ пулăшу панине палăртрĕ. Райадминистрацин вĕрентÿ, çамрăксен политики тата культура пайĕн начальникĕн çумĕ А.П.Чумуркина слет кун йĕркипе, çар вăййисен условийĕпе паллаштарчĕ, отделенисене ăнăçу сунчĕ.
Çамрăк армеецсем валли тĕрлĕ заданисем пулчĕç. Отделенисем стройпа утса юрă юрларĕç, тĕрлĕ командăсем пурнăçларĕç, автомата сÿтсе пăрахса каялла пуçтарчĕç, пневматика винтовкинчен печĕç, 2 километра марш-бросок чупрĕç, хăйсен отделенийĕпе паллашатаракан электронлă презентаци ирттерчĕç.
Судьясен коллегийĕ – ăна райадминистрацин гражданла оборона тата чрезвычайлă лару-тăрăва пĕтерекен пай начальникĕ П.С.Угасин ертсе пычĕ – çар вăййисен кăтартăвĕсене пĕтĕмлетсен Шăмăршăри вăтам шкулти «Патриот» клуб (руководителĕ Ю.Ф.Ермолаев) – пĕрремĕш вырăна тухни палăрчĕ. Васан шкулĕн кадет класĕн отделенийĕ (Н.А.Архипов) – иккĕмĕш, Анат Чаткас шкулĕнчи çамрăк армеецсен отделенийĕ виççĕмĕш вырăнсене пайларĕç.
«Стройпа утасси» тата «Электронлă презентаци ирттересси» номинацисенче – Палтиелсем, «Марш-бросок чупасси» номинацире Анатчаткассем пĕрремĕшсем пулчĕç.
Çĕнтерÿçĕ-командăсем Кубоксем тата Грамотăсем илчĕç.