10 марта 2010 г.
Виçпÿрт Шăмăршă ялĕ тăван республикăн кăнтăр чиккинче вырнаçни Тутар Республикипе тата Ульяновск облаçĕпе культурăпа спорт енĕпе тачă çыхăну тытма май парать. Çак пархатарлă ĕçре ялти шкулта ĕçлекен учительсемпе вĕренекенсен тÿпи пысăк. Виçпÿрт Шăмăршăри тĕп шкулти çамрăк спортсменсем хăйсен вăйĕсене шкулта, районта анчах мар, республика тулашĕнче иртекен ăмăртусенче те виçеççĕ. Вĕсен шутĕнче – Петр Кузьмин, Андрей Муллин, Денис Юманов, Полина Егорова, Марияпа Дария Семеновасем тата ыттисем.
Нумаях пулмасть кÿршĕ республикăри Çĕпрел районĕнче иртнĕ «Тутарстан шанчăкĕсем» ăмăртура йĕлтĕрпе чупса 7-мĕш класра вĕренекен Полина Егоровапа 8-мĕш класри Мария Семенова пĕрремĕш вырăнсене йышăнчĕç, Грамотăсем тата панесем илме тивĕçрĕç.
Мала тухнă маттур хĕр ачасем Хусан хулинче чи вăйлисен хушшинче иртнĕ ăмăртăва хутшăнса пĕрремĕш теçеткери вырăнсене тухнă (4-мĕш, 6-мĕш кăтартусем).
Çамрăк çĕнтерÿçĕсен кăтартăвĕсем, паллах, ăнсăртран мар. Вĕсен çитĕнĕвĕсенче физкультура урокĕсене ертсе пыракан В.П.Бондареев учителĕн тÿпи пысăк. Ашшĕ-амăшĕсем те ырă тĕслĕх кăтартаççĕ. Полинăн ашшĕ А.В.Егоров Сенгилейри педагогика училищинче тренер пулса ĕçленĕ, кайран ялти шкулта физкультура учителĕ пулса вăй хунă. Вăл Полинăна ачаранах спорта юратма вĕрентнĕ, тренировкăсене тĕрĕс йĕркелесе пынă. Семеновсен çемйинче те спорта юратаççĕ: вĕсем пурте ÿт-пĕве сивĕ шывпа пиçĕхтереççĕ, спорт ăмăртăвĕсене хаваспах хутшăнаççĕ.
Спортра та, вĕренÿре те малтисен ретĕнче маттур хĕрачасем. Вĕсем шкул чысне пур енĕпе те çĕклеççĕ.