13 марта 2010 г.
АСЛĂ ÇĔНТЕРŸ 65 çул тултарнине вăрçăпа тыл ветеранĕсем уйрăмах хумханса кĕтеççĕ. Вăхăт нумай иртнĕ пулин те, ватăсем вăрçă çулĕсене манмаççĕ, вĕсем чĕрере ĕмĕрлĕхех юлнă.
Районта пурăнакан 846 ветерана Тăван çĕршыв юбилей медалĕпе наградăланă. Ятарласа çирĕплетнĕ графикпа килĕшÿллĕн, район администрацийĕн ответлă ĕçченĕсем ялсенче пулса савăнăçлă лару-тăрура ветерансене çак медальпе чыслаççĕ.
Район пуçлăхĕ В.П.Фадеев иртнĕ кунсенче Васан ял поселенийĕнче пулнă, арлă-арăмлă Поляковсене килне пырсах медальсем панă. Кил хуçи – Александр Семенович – вăрçă инваличĕ, унăн мăшăрĕ – Мария Михайловна – тыл ветеранĕ. Пысăк наградăна ватăсем куççуль витĕр йышăннă, чыс-хисепшĕн чĕререн тав тунă.
– Вăрçă-харçă урăх нихăçан та ан пултăрччĕ, – тенĕ ветерансем. – Эпир çĕршыв ертÿçисем мирлĕ пурнăçшăн тăрăшнине чĕререн ырлатпăр. Раççей çарĕ вăйлă пулсан, пирĕн çине никам та тапăнма хăяймĕ. Çамрăксене Тăван çĕршыва чĕререн юратма чĕнсе калатпăр.
ŸКЕРЧĔК ÇИНЧЕ: район пуçлăхĕ В.П.Фадеев Александр Семеновичпа Мария Михайловна Поляковсене юбилей медалĕ илнĕ ятпа саламлать.