13 марта 2010 г.
ВĂХĂТА тытса чараймăн: çуркунне алăкран шаккать. Эппин, çур акиччен те вăхăт нумай юлмарĕ. Хуçалăхсем хĕрÿ тапхăра мĕнле хатĕрленеççĕ-ши?
Кунта чи пĕлтерĕшли – вăрлăхсем. Çĕрпÿри наукăпа тĕпчев институтĕнчен «Московская-35» сортлă тулă 12 тонна, «Адамо» сортлă сĕлĕ 5 тонна туянма палăртнă. Уйрăм хуçалăхсем вĕсене илсе килме ĕлкĕрнĕ те. Ку тĕлĕшпе «Агросервис» ОООна палăртмалла. Паян кунта ытти вăрлăхсене те сортлаççĕ.
«Карлинская» агрофирмăра та вăрлăхсем тĕлĕшпе лару-тăру лайăх, вĕсене Шупашкарта тĕрĕслеттернĕ, пурте тивĕçлĕ кондицие ларнă. Халĕ «Исток» ОООра, «Шанс» ОООра вăрлăхсене сортласа кондицие çитерес тĕлĕшпе ĕçлеççĕ.
Тухăç мĕнлерех пуласси сортсенчен те нумай килет. Кăçал, сăмахран, «Искра» СХПК тата «Пулмантăш» КФХ çĕр улми сорчĕсене çĕнетесшĕн.
Минераллă удобренисене «çĕр çăкăрĕ» тетпĕр – вĕсемсĕр те пысăк тухăç илеймĕн. Çур аки валли вĕсем 2400 тоннăран кая мар кирлĕ. «Агросервис» ООО удобренисене çителĕклĕ чухлех хатĕрленĕ. Ытти хуçалăхсем те ку тĕлĕшпе ĕçлеççĕ – килĕшÿсем тунă, паян-ыран турттарма пуçлаççĕ.
Хуçалăхсенче техникăна, кăкарса ĕçлемелли агрегатсене юсас тĕлĕшпе те тăрăшаççĕ.