17 марта 2010 г.
ТУНТИ КУН район администрацийĕнче иртнĕ анлă канашлура Тăван çĕршывăн Аслă вăрçинче Çĕнтерÿ тунăрăнпа 65 çул çитнине хатĕрленсе кĕтсе илес ыйту чи пысăк пĕлтерĕшли пулчĕ. Район пуçлăхĕ В.П.Фадеев Çĕнтерÿ кунне чаплăн паллă тумаллине, вăрçăпа тыл ветеранĕсене пĕтĕм халăхпа чысламаллине палăртрĕ.
«Кашни ялтах обелисксене юсаса йĕркене кĕртмелле, сăрласа илемлетмелле, – терĕ В.П.Фадеев. – Палăксене шкулсенчи Тимур отрячĕсем шефа илсен питĕ лайăх пулĕччĕ. Кунтах илемлĕ чечексем ешерччĕр, уяв кунĕнче çеç мар, ытти чухне те тирпей пултăр».
Район пуçлăхĕ кашни фронтовик çурчĕ çине «Кунта Тăван çĕршыва тăшманран хÿтĕлесе хăварнă паттăр пурăнать» тесе çырнă мемориал хăми çапма сĕнчĕ. Çак ĕçе çулталăк тăршшĕнче пурнăçлама май тупмаллах.
Ветерансен пурнăç условийĕсемпе, сывлăхĕпе пĕрмай интересленмелле, вĕсене май пур таран пулăшма тăрăшмалла, терĕ В.П.Фадеев.
Канашлура çурхи ака-суха ĕçĕсене хатĕрленес, çуркуннехи вăйлă шыв-шуртан сыхланас ыйтусене те çĕклерĕç, хĕрÿ тапхăр валли çунтармалли-сĕрмелли материалсем туянассине хăвăртлатмаллине палăртрĕç.