24 марта 2010 г.
ПУЯНКАССИНЧИ Чăваш Республикин культурин тава тивĕçлĕ ĕçченĕ Н.П.Федотова ертсе пыракан «Ахаяс» фольклор коллективне хамăр тăрăхра кăна мар, республикăра та лайăх пĕлеççĕ. Тăван районта ят-сум илнĕ пултаруллă коллектив хăйĕн программине район тулашĕнче пĕрремĕш хут 1993 çулта, Патăрьелĕнче «Ахаяс» ятпа иртнĕ чăваш юрри-ташшин республика фестивалĕнче кăтартнă. Пуянкасси ял библиотекинчи хĕрарăмсен «Сенкер тĕпел» клуб çумĕнчи фольклор коллективĕ ун чухне «Улах сăрин» уявне ĕнентерÿллĕн сăнласа панă. Уява вырăнти фольклор юрри-ташшипе, сăвви-такмакĕпе пуянлатнине, илемлĕх мелĕсемпе пĕлсе те вырăнлă усă курнине жюри членĕсем тÿрех асăрханă, коллектив пирки ăшă сăмахсем каланă. Хăйсене Диплом парса хисеплени Пуянкассисене савăнтарнă, çĕнĕ ÿсĕмсем тума хавхалантарнă. Кун хыççăн вĕсем хăйсен коллективне «Ахаяс» ят пама йышăннă.
1994 çулта Александр Васильев тележурналист, чăваш телевиденийĕнче «Янра, хуткупăс, савăнăçлă тусăм» кăларăмсем йĕркелесе пынăскер, Шăмăршă тăрăхне килнĕ, Патирек ялĕнче Пуянкассисен «Улах сăри» уявне те ÿкерсе илнĕ. Программăна хутшăнса шкулта вĕренекен Алексей Андронов ун чухне хамăр тăрăхри кĕвĕсене купăспа ăста каласа панă. Каярахпа вăл педагогика университечĕн музыка уйрăмне пĕтернĕ, халĕ – «Ахаясăн» аккомпаниаторĕ.
1995 çулта «Ахаяс» коллективăн тепĕр уявне – «Сурхурине» те телевиденипе ÿкерсе кайнă, ăна та чăваш телевиденийĕпе кăтартнă.
2007 çулта «Ахаяс» фольклор коллективĕ хăйĕн юрри-ташшине Раççей шайĕнче иртнĕ халăх пултарулăхĕн Пушкăртстанри фестивальте кăтартма тивĕçлĕ пулнă. Унăн пултарулăхне сумлă Димпломпа хакланă.
2009 çулта пултаруллă коллектива Республика уявне те чĕнсе илнĕ. «Раççей çăл куçĕсем» тата «Ĕмĕрсен эрешĕсем» фестивальсенчен Пуянкассисем Дипломпа тата Лауреат званийĕпе таврăннă.
Çав çулхи октябрьте «Ахаяс» хăйĕн презентацине ирттернĕ. Республикăри халăх пултарулăхĕн çурчĕн специалисчĕсем коллективăн репертуарĕ анлă та нумай енлĕ пулнине, сцена ăсталăхĕ çÿллĕ шайра тăнине палăртнă.
Патриотла темăна та манăçа хăвармасть фольклор коллективĕ. Сăмахран, 2008 çулта иртнĕ «Юрла, салтак, юрла» республика фестивалĕн Патăрьелĕнчи зонинче коллективăн пултарулăхне лайăхпа хакланă, Шупашкара пыма йыхравланă. Кăçал январьте йĕркеленĕ «Çĕнтерÿ салючĕ» республика фестивалĕнче «Ахаяс» вăрçă вăхăтĕнче Улах ларнине чун хумханмалла кăтартса пачĕ.
«Ахаяс» йышĕнче – тăван тăрăхри юрă-ташăна, асатте-асаннесен йăли-йĕркисене чунтан юратакан çынсем. Вĕсем авалхи юрă-ташăна, сăвă-такмака çĕнĕрен чĕртсе тăратса, илемлĕх мелĕсемпе пуянлатса халăх умне кăлараççĕ. Кунта, паллах, «Ахаяс» йышĕнчи малтанхи юрăçă-ташăçăсене асăнса хăварни те вырăнлă. Вĕсем – В.Михайлова, Л,Полякова, ЧР тава тивĕçлĕ ял хуçалăх ĕçченĕ Н.Тимофеева, Л.Угарина, Т.Кудрявцева, М.Алексеев, К.Тимофеева, М.Мресов, В.Антонов, Г.Ефимова, Н.Андреев.
Хальхи вăхăтра коллективра Ф.Тимофеев, А.Гордеева, О.Тимофеева, В.Борисова, Н.Петрова, Т.Хайыдова, С.Пушкина, Л.Михайлова, Л.Юманова, Н.Спиридонова, Р.Алексеева, Л.Карсакова, Г.Афанасьева, З.Петрова, О.Кузнецов, Ф.Никифоров, Г.М.Андреева, Г.С.Андреева, çамрăксенчен Т.Федотова, Н.Пушкина, А.Андронов, А.Н.Тимофеев, А.Ф.Тимофеев, А.Михайлов, А.Ильин, Валерийпе Владимир Петровсем юрлаççĕ.
Хастар та пултаруллă коллектива сцена çинче малашне те ăнăçу сунатпăр.