31 марта 2010 г.
ХĂЙСЕН килĕ умне çăмăл автомашина çитсе чарăннине, кабинăран çÿллĕ те патвар арçын тухнине Менир Феткуллович чÿречерен курчĕ.
– Вара ку район пуçлăхĕ Валерий Петрович Фадеев вĕт; – пăлханса ÿкрĕ ĕç ветеранĕ. – Мĕн сăлтавпа килчĕ-ши;
Менир Феткуллович хаклă хăнана ăшшăн та тарават кĕтсе илчĕ. Хăйне çуралнăранпа 75 çул тултарнă ятпа район администрацийĕн Хисеп грамотипе наградăлани, В.П.Фадеев çак сăлтавпа ятарласах Палтиелне килни çинчен пĕлсен, ветеранăн куçĕсене савăнăç куççулĕ йĕпетрĕ.
Пархатарлă та сумлă пурнăç çулĕпе утса тухнă М.Ф.Азизов. Тăван колхозра прицепщик, комбайнера пулăшаканĕ, тракторист, трактор бригадин бригадирĕ пулса ĕçленĕ. Чунтан тăрăшса вăй хунăшăн ăна «Халăхсен туслăхĕ» орденпа, медальсемпе наградăланă. Менир Феткуллович виçĕ созыв ял Совечĕпе район Совечĕн депутачĕ пулнă, ăна районти халăх сучĕн заседательне те суйланă. Икĕ хутчен «Районти чи лайăх сухаçă» ята тивĕçнĕ.
– Хĕрĕх çул ытла техникăран уйрăлман, – тет Палтиел ялĕн хисеплĕ çынни М.Ф.Азизов. – Чунпа эпĕ халĕ те сухаçă, тĕлĕкре «Сталинец-6» комбайнпа, ДТ-54, ДТ-75М, Т-74 тракторсемпе ĕçленине, хамăн юлташсене куратăп.
Çитмĕл пиллĕкри ĕç ветеранне, вăрçă ачине М.Ф. Азизова эпир çирĕп сывлăх, вăрăм ĕмĕр сунатпăр.