10 апреля 2010 г.
АСЛĂ Çĕнтерÿ 65 çул тултарнине тата Учитель çулталăкне халалланă пысăк концерт программине уçса, Васан ял поселенийĕн хорĕ «Мы – армия народа» тата И.Саландаев Совет Союзĕн Геройне В.И.Урукова халалласа çырнă сăвăпа И.Медведев кĕвĕленĕ «Комбат» юрăсене кăмăла çĕклемелле юрласа пачĕ. Хор хыççăн арçынсен ансамблĕ «Çыру çырсамăр салтаксем патне», Жанна Антиповапа Ирина Саландаева юрăçсем «Война» юрра питĕ ăста шăрантарчĕç.
Зоя Антонова В.Михайлов çырнă «Пуçа та çухатма пултарнă» сăвва чуна пырса тивмелле вулама пуçласан вара куракансем куççуль кăлармасăр чăтаймарĕç.
Ярăславри çамрăксенчен тăракан «Умарино» ирçе фольклор ушкăнĕ сцена çинче хальхи эстрада юррине тăван чĕлхепе килĕшÿллĕ юрларĕ.
Иванпа Валентина Тихоновсем тата вĕсен хĕрĕ Снежана сцена çинче яланах кĕтнĕ артистсем. Çак çемье ансамблĕ чăваш юрри-такмакĕсене юрласа савăнтарать куракансене. Снежана учительсене халалланă юрра та, кулăшла юптарăва та питĕ ăста вуласа пачĕ.
Ларшниковсен çемье ансамблĕ вара куракансен умне чăвашсен кĕвĕ каламалли хатĕрĕсемпе тухрĕ. Хут купăспа Герман Ларшников, унăн ывăлĕ Владислав «тура», тăм шăхлич, параппан, шакăртма, кашăк тата ытти кĕвĕ инструменчĕсемпе питĕ ăста выляса пачĕç. Пиллĕкри Роман мăнукĕ чăваш такмакĕсене шăрантарма пуçласан куракансем чăтса лараймарĕç, тулли кăмăлпа алă çупса хавхалантарчĕç пĕчĕкçĕ артиста.
Хĕрарăмсен ансамблĕ шăрантарнă юрăсене те, кадет класĕнче вĕренекен хĕрсемпе каччăсем ташланă илемлĕ вальс ташшисене те, «Селĕп хĕрсем» кулăшла сценкăна та, Васанти ача садне çÿрекен шăпăрлансем анне çинчен шăрантарнă юрра та куракансем хапăлласа йышăнчĕç.
Юлашкинчен сцена çине Пĕтĕм Раççейри тата республикăри конкурссемпе фестивальсен лауреачĕ, Васанти халăх музейĕ çумĕнчи ачасен «Мерчен» халăх фольклор ансамблĕ тухрĕ. Г.Ларшников ертсе пыракан ачасен ушкăнĕ хăйсен уçă та янăравлă сассисемпе чăваш халăх юрри-кĕввине, сăвви-такмакне шăрантарса панă, килĕшÿллĕн ташланă хыççăн куракансем нумайччен тăвăллăн алă çупрĕç.