21 апреля 2010 г.
– ÇУР акине тахçанах хатĕр эпĕ, – терĕ Çĕнĕ Чукалти "Пулмантăш" фермер (хресчен) хуçалăхĕн ертÿçи Валерий Симурзин.
Кăçал вăл 10 гектар лаптăк çинче "Удача" тата "Невский" сортсемлĕ çĕр улми лартса çитĕнтересшĕн. Çĕнĕ сортлă вăрлăх туянас шухăшĕ те пур.
25 гектар тулă, 10 гектар урпа пулĕç. Кĕркунне 75 гектар кĕрхи тулă акса хăварнă пулнă. Калчасем лайăх хĕл каçни пирки иккĕленмест фермер.
Хуçалăхăн вăрлăхсем çителĕклĕ. Вĕсене лабораторире тĕрĕслеттернĕ, пурте кондициллĕ шутланаççĕ. Вăрлăхлăх çĕр улми те лайăх упраннă. В.Симурзин вăрлăхсене кăçал та имçамласа акасшăн.
Çур аки ирттерме, кĕр калчисемпе 30 гектар çинчи нумай çул ÿсекен курăксемпе апатлантарса хăварма минераллă удобренисем çителĕклĕ. Тракторсем, кăкарса ĕçлемелли агрегатсем хатĕр. Çунтармалли-сĕрмелли материалсем тĕлĕшпе те йывăрлăхсем пулмалла мар.