22 мая 2010 г.
АЧАСЕМПЕ çамрăксен обществăлла организацийĕсем çак ăрусемшĕн хăйне евĕр воспитани институчĕ пулса тăраççĕ. Паянхи кун тĕлне районти шкулсенче ачасен 11 обществăлла организацийĕ ĕçлет. Кунсăр пуçне патриотла клубсемпе çамрăк армеецсен отделенийĕсем, КВН командисем пур. Организацисен ĕçĕ-хĕлĕ тĕрлĕ енлĕ: вĕренÿпе воспитани, спорт, экологи ĕçĕ, патриотла юхăм, лидерсен ĕçĕ, волонтерсен пулăшăвĕ, творчествăлла туртăм тата ыт.те. Директорсен çумĕсем йĕркелесе, лидерсем ертсе пынипе, обществăлла организацисем вĕренÿ çулĕ тăршшĕпех планпа килĕшÿллĕн ĕçлесе пыраççĕ.
Майăн 17-мĕшĕнче районти ача-пăча организацийĕсем Шăмăршăри культура аталанăвĕн центрне фестивале пухăнчĕç. Вĕсем сцена çинче хăйсен творчество пултарулăхĕпе, ĕçĕ-хĕлĕпе паллаштарчĕç. Кун хыççăн организацисен лидерĕсем проблемăлла дискуссие хутшăнчĕç. Дискусси теми: «Чăваш Республикин Президенчĕ Н.В.Федоров Чăваш Патшалăх Канашне янă Çырура палăртнă тĕллевсене пурнăçа кĕртессинче обществăлла организацисен лидерĕсем хăйсен задачисене мĕнлерех кураççĕ;»
Лидерсем тĕрлĕ проблемăллă ыйтусене сÿтсе яврĕç: вĕрентÿ ĕçĕн аталанăвĕ, компьютер технологийĕсемпе усă курасси, аслă пĕлĕвĕн пĕлтерĕшĕ, «Таса шыв» программа – халăхшăн, экологи проблемисем. Дискуссире вăрçăпа педагогика ĕçĕн ветеранĕсем Н.Г.Павловпа (Васан) А.И.Гармонщиков (Пăчăрлă Пашьел), педагогика ĕçĕн ветеранĕсем Р.С.Минеевапа (Палтиел) Е.В.Удочкина (Шăмăршă) тата район пуçлăхĕн çумĕ Н.Г.Игнатьева та пулчĕç.
Комисси членĕсем район конкурсĕн тĕрлĕ тапхăрĕсенчи тĕрĕслевсен (сочинени-шухăшлав, социаллă проект, творчествăлла ĕç-хĕл, дискуссире проблемăлла ыйтăва татса парасси) кăтартăвĕсене пĕтĕмлетсен, пĕрешкел балсем пухса Шăмăршă вăтам шкулĕн «Пурте пĕрле» ача-пăча организацийĕн лидерĕ Екатерина Муромцева тата Палтиел вăтам шкулĕн «Туслăх» ача-пăча организацийĕн ертÿçи Юлия Крылова пĕрремĕш вырăна тухни палăрчĕ. Виктория Мердеева (Васан шкулĕ, «Калча») – иккĕмĕш, Анастасия Нянина (Анат Чаткас шкулĕ, «Чаткассем») виççĕмĕш вырăнсене тухрĕç. Призерсем Грамотăсемпе парнесене тивĕçрĕç.
Фестивале вĕçлесе, Шупашкартан килнĕ «Апельсин каччисем» вокал ушкăнĕ концерт кăтартрĕ.