29 мая 2010 г.
ПАЛТИЕЛĔНЧИ вăтам шкулта кадетсен класне 2005 çулта йĕркеленĕ. Кадетсен Положенийĕпе Уставне, Присягине тата ытти документаци хучĕсене туса хатĕрлес енĕпе шкул директорĕн воспитани енĕпе ĕçлекен çумĕ С.Р.Сандркина, кадетсен 10 класĕн воспитатель-наставникĕ Л.А.Стратилатов çине тăрса ĕçленĕ.
Вуннăмĕшсем, тĕп предметсене вĕреннисĕр пуçне, çар ĕçĕпе (строй тата физкультура хатĕрленĕвĕ, çар Уставĕ, топографи, гражданла оборона, пăшалпа тактика хатĕрленĕвĕ) çыхăннă занятисене те çÿреме пуçланă. Çавăн пекех, вырăс чĕлхин риторикипе логика шухăшлавĕн занятийĕсем те пулнă.
Кадетсен ĕç-хĕлĕ планпа килĕшÿллĕн пынă. Вуннăмĕшсем кадетсен республикăри тĕрлĕ мероприятийĕсенчен Грамотăсемпе, Дипломсемпе таврăннă. Шкулта лазер вăйĕпе ĕçлекен «Рубин» стрелковăй тир уçăлни пневматика хĕç-пăшалĕнчен тĕл перес тĕлĕшпе хăнăху илессинче пысăк пулăшу парса тăнă.
2007 çулта 12 яшпа пĕр хĕр вăтам пĕлÿ илсе шкулпа сывпуллашнă. Выпускниксенчен иккĕшĕ – Дамир Вахитовпа Айнас Файзурахманов – çав çулах Ульяновскри Б.Хмельницкий ячĕллĕ çар институтне вĕренме кĕнĕ. 10 йĕкĕт вара действительнăй çар службине кайнă. Службăра вĕсем пурте сержантсен шкулне пĕтернĕ, отделени командирĕ е взвод командирĕн çумĕ пулнă. Çакăнта мар-и вара кадет класĕн тĕп тĕллевĕ, пысăк пĕлтерĕшĕ;
2007-2008 вĕренÿ çулĕнче улттăмĕш класри ачасем – 8 яшпа 15 хĕр ача – кадетсен йышне кĕнĕ. Взвод командирĕ пулма Артем Кузьмина çирĕплетнĕ. Гюзель Емдиханова, Рашид Хакимов тата Кристина Кузьмина отделени командирĕсен должнăçĕсене йышăннă.
Кадетсен воспитатель-наставникĕ Л.А.Стратилатов саккăрмĕш класс руководителĕпе Г.В.Пайминăпа тата директорăн воспитани енĕпе ĕçлекен çумĕпе С.Р.Сандркинăпа (вăлах кадетсен кураторĕ) тачă çыхăнса ĕçлет. Пĕрлехи вăйпа педагогсем шкулта кадетсемпе нумай мероприяти йĕркелеççĕ. Саккăрмĕшсем районти, республикăри патриотика фестивалĕсене, конкурсĕсене те активлă хутшăнаççĕ, призлă вырăнсене тухаççĕ. Кăçалхи мероприятисене илсен, Раççей Геройне Олег Долгова халалланă патриотла юрăсен районти фестивалĕнче Кристина Долгова виççĕмĕш вырăн çĕнсе илнĕ. Вăлах «Тăван çĕршывăн çамрăк таланчĕсем» республика фестивалĕнче те, кадетсен Пĕтĕм Раççейри творчество конкурсĕнче те «Соло-вокал» номинацире виççĕмĕш вырăн йышăннă. Фестивальте саккăрмĕшсем «Илемлĕ фотографи» номинацире иккĕмĕш вырăна тухса Диплома тивĕçни те кадетсен класне илем кÿрет.
Аслă Çĕнтерĕвĕн 65 çулхи юбилейне халалланă ялти, районти мероприятисенче те кадетсем пысăк активлăхпа палăрчĕç. Çамрăк армеецсен нумаях пулмасть иртнĕ районти çар вăййисенче те Палтиел кадечĕсем хăйсене лайăх енĕпе кăтартрĕç.
Вĕренÿ шкулти ачасен тĕп тĕллевĕ пулса тăрать. Çак вĕренÿ çулне кадетсен çур класĕ «4» тата «5» паллăсемпе вĕçлени те саккăрмĕшсем кадет чысне çÿлте тытса пынине çирĕплетет.