02 июня 2010 г.
ИЮНĔН 1-мĕшĕнче пирĕн районта Пĕтĕм тĕнчери ачасене хÿтĕлемелли куна анлăн паллă турĕç.
Шăмăршăри «Ромашка» ача сачĕн шкула каяс умĕнхи «Семицветик» ушкăнĕнче сывпуллашу балĕ иртрĕ. Ача сачĕн заведующийĕ Е.Н.Гадиева пурне те уяв ячĕпе чĕререн саламларĕ, выпускниксене парнепе чысларĕ. Ачасем ашшĕ-амăшĕсене хаваслă юрă-ташăпа савăнăç парнелерĕç. Юлашкинчен пĕчĕккисем сывпуллашу вальсĕнче çаврăнчĕç.
Е.ВЕРЬЯЛОВА.
х х х
ПĂЧĂРЛĂ ПАШЬЕЛĔНЧИ «Асамат кĕперĕ» ача садне çÿрекен 7 ача кĕркунне шкул сакки çине ларма хатĕрленет. Хăйсен «Сывă пул, юратнă ача сачĕ» утренникне вĕсем хисеплĕ воспитателĕсене, няньăсемпе поварсене халалларĕç, нумай ăшă сăмах каласа сăвăсем вуларĕç, юрăсем шăрантарчĕç. Т.И. Саминова ертсе пыракан туслă коллективра Т.И.Евлешкина воспитатель, Т.И.Воронцова няня, Н.И.Судуковапа Н.В.Малышева поварсем нумай çул вăй хураççĕ. Вĕсем пурте чунри ачашлăхне ачасене парнелесе, хăйсен ĕçне парăнса ĕçлеççĕ. Пĕчĕк пепкесене пысăк тимлĕх уйăрса вулама-çырма, ÿкерме, ал ĕç тума хăнăхтарнăшăн ашшĕ-амăшĕсем ача сачĕн ĕçченĕсене тав сăмахĕсем каларĕç. Çак çăмăл мар ĕçре нумай çул тăрăшма сывлăх сунчĕç. Тунсăхлăн сывпуллашрĕç ачасемпе воспитательсем, кунта малашне те килсе çÿреме йыхравларĕç, шкулта пысăк ăнăçусем сунчĕç.