11 июня 2010 г.
ЫТЛАРИ КУН район администрацийĕ çирĕплетнĕ ятарлă комисси пĕрлешÿллĕ хуçалăхсемпе фермерсен хирĕсене пăхса тухрĕ, çурхи ака-суха ĕçĕсене кам мĕнле ирттернине тишкерчĕ.
Виçпÿрт Шăмăршă ялне ирпе ултă сехетрех çитрĕмĕр пулин те, «Карлинская» Агрофирма» ЗАО ертÿçи И.М.Абсалямовпа унăн ывăлĕ – «Савантей» фермер хуçалăхĕн хуçи Владимир техника паркĕнчеччĕ. Хирсене кăтартса çÿреме хаваспах килĕшрĕç вĕсем. Тÿрех каламалла, çур акине чунтан тăрăшса ирттернĕ кунта. Пĕрчĕллĕ культурăсем те, сахăр чĕкĕнтĕрĕ те аван шăтса тухнă. Çум курăксемпе кĕрешсе гербицитпа усă курнă. Эпир пынă чух Александр Кузьмин, Александр Гладков тата Сергей Матвеев 37 гектар çинчи элита тулла гербицитпа пĕрĕхетчĕç.
– Тырă аван çитĕнет, çумăр çеç кирлĕ, - терĕç механизаторсем. Çак сăмахсене ытти хуçалăхсенче те илтрĕмĕр. Çур аки иртнĕренпе те çĕре витермеллĕх çумăр çумарĕ-ха, нÿрĕк вара çав тери кирлĕ.
«Колос» Агрофирма» ЗАО 300 гектар сахăр чĕкĕнтĕрĕпе 950 гектар пĕрчĕллĕ культурăсем акнă. Калча лайăх çитĕнет, çум курăксене гербицидсемпе пĕтереççĕ.
«Исток» ООО хирĕсем те кăмăла çĕклерĕç. 30 гектар çинчи çĕр улми те лайăх ÿсет. «Эльф» сортлă супер-элита урпапа «эстер» сортлă супер-элита тулла ытараймасăр пăхса тăтăмăр.
«Восход» СХПК механизаторĕсем те мухтава тивĕç. Д.Бахитовпа В.Васильев акнă хирсене комисси «пиллĕк» паллăпа хакларĕ.
«Мир» ЗАОпа «Искра» СХПКра та калчасем лайăх çитĕнеççĕ. Çум курăксемпе кĕрешесси çинчен те манмаççĕ.
Пăчăрлă Пашьелĕнчи А.И.Сатеев фермерăн хирĕсене те тиркеме çук. Мĕн акни-лартни хÿхĕм çитĕнет. Пире уйрăмах куккурус хирĕ килĕшрĕ. «Уй-хир пики» 40 гектар йышăнать, ăна «Чăваш Ен – Германи» программăпа килĕшÿллĕн çитĕнтереççĕ. Çичĕ сорт акнă, пирĕн тăрăхра хăш сорчĕ лайăхрах ÿснине тĕрĕслесе пăхаççĕ.
Çĕнĕ Чукалти «Пулмантăш», Карапай Шăмăршăпа Çĕнĕ Тăрăнти «Слава», «Кузьмич», «Малалла», «Труд» фермер хуçалăхсенче те калчасем чуна савăнтараççĕ.
Паллах, хăш-пĕр çĕрте çитменлĕхсем те пур-ха. «Агродор» хуçалăхра, акă, çум курăксемпе кĕрешме халĕ те пуçăнайман. Пиçенпе шурут пусса илнĕ хирсенчен пысăк тухăç илеймĕн.