11 июня 2010 г.
Вун сакăр çул каяллах пулнă çакă. Чулхулари педагогика институтĕнчен вĕренсе тухнă А.Еремеев яла пĕччен таврăнман – пĕр институтрах ăс пухнă Оля та унпа пĕрле Вырăс Чукалне килме кăмăл тунă. Александр Еремеев – технологи учителĕ, Ольга Михайловна – математикăпа информатика вĕрентекенĕ. Çамрăк специалистсене, тĕрĕсрех çамрăк мăшăра шкул директорĕ, Александрăн ашшĕ С.Еремеев кĕтсе илнĕ.
Çĕнĕ çынсем çĕнĕлĕхсем илсе килеççĕ тени тĕрĕсех çав. Еремеевсем Чукалти вăтам шкулта ĕçлеме тытăнсан çĕнĕлĕхсем сахал мар пурнăçа кĕнĕ, çамрăк педагогсем уроксене ку чухнехи çĕнĕ технологисемпе усă курса ирттерме пуçланă. Пĕр сăмахпа, шкул пурнăçĕ çĕнĕлле вĕреме тытăннă темелле. Еремеевсем уроксем хыççăн та ачасемпе нумай ĕçленĕ, тĕрлĕрен кружоксем йĕркелесе янă. Сăмахран, Ольга Михайловна вун тăватă çул шкул тулашĕнчи ĕçсен организаторĕ пулнă.
Александр Сергеевич "Бодибилдинг" кружока ертсе пынă. Унта хаваспах çÿрекен ачасем хăйсене вăй-хал, кĕлетке мускулатури тĕлĕшпе аталантарма хăнăхнă.
Тĕрлĕрен мероприятисене, конкурссене тăрăшса, тĕплĕн хатĕрленме тытăннă чукалсем, хăйсен пултарулăхĕпе, ăсталăхĕпе тĕлĕнтернĕ, савăнтарнă. Ачасен тумĕсем те питĕ килĕшÿллĕ – вĕсене Ольга Михайловна хăех çĕленĕ, эскизĕсене те хăех хатĕрленĕ. Çак ĕçре ăна шкултах çĕвĕç-мотористка ăсталăхне алла илни нумай пулăшнă. Поэзипе те туслă вăл. Ытларах чухне конкурссене хутшăнмалли сăвăсене те учитель хăех хайланă.
Александр Сергеевич та – талантлă учитель. Тĕп предмета вĕрентнисĕр пуçне, çиччĕмĕш çул ĕнтĕ физкультурăпа ОБЖ урокĕсене илсе пырать. А.Еремеев тăрăшнипех шкулта физкультурăпа спорт юхăмĕ çĕнĕрен вăй илнĕ: халĕ футбол, хоккей командисем районти турнирсене те хутшăнаççĕ. "Зарница", "Орленок" вăййисенче те чукалсем кашни çул тенĕ пекех призлă вырăнсене йышăнаççĕ.
Сăмах май, А.Еремеев кăçал районти ОБЖ учителĕсем хушшинчи "Учитель-наставник" конкурсра иккĕмĕш вырăн йышăнчĕ, çавăн пекех Аслă Çĕнтерÿ тунăранпа 65 çул çитнине халалланă конкурсра художество пултарулăх ăстисем хушшинче çĕнтерÿçĕ пулса тăчĕ.
Александр Сергеевич вĕренекенĕсем виççĕмĕш çул ĕнтĕ Çĕнĕ Шупашкарта иртекен "Наука. Пултарулăх. Аталану" ăслăлăхпа практика конференцийĕнчен çĕнтерÿçĕ, призер пулса таврăнаççĕ. Сăмах май, вăл кăçал хăйĕн коллегисем валли методика идейисене пурнăçа кĕртес тĕлĕшпе йĕркеленĕ фестивальте ятарлă уçă урок ирттерчĕ, унта хăва хуллинчен тĕрлĕрен япаласем çыхса ăсталамалли вăрттăнлăхсемпе паллаштарчĕ. Компьютерпа усă курса тепхнологие вĕрентмелли уçă урока та вăлах районта чи малтан хатĕрленсе ирттерчĕ.
Ольга Михайловна та ăста педагог пулнине маларах асăнтăмăр-ха. 1995 çулта, сăмахран, вăл Шăмăршăри вăтам шкулта вĕренекенсемпе ирттернĕ конкурслă математика урокне пысăк хак панăччĕ, педагог хăй конкурс призерĕ пулнăччĕ. Çавăн пекех О.Еремеева 1999 çулта республикăри "Çулталăк учителĕ" конкурса хутшăнма тивĕçлĕ пулнăччĕ, финала тухнăччĕ. Кăçал вара вăл республика шайĕнчи уçă уроксен фестивалĕн лауреачĕн ятне тивĕçрĕ. 2007 çултанпа шкул "Районти чи лайăх шкул" конкурсра лайăххисенчен пĕри шутланать. Шкул директорĕн тивĕçне те ăнăçлă пурнăçлать Ольга Михайловна.
Еремеевсем – районти чи çамрăк учительсен çемйи. Хĕрĕхре çеç-ха вĕсем. Вĕсен пуласлăхĕ пысăк. Педагог ĕçне суйласа илнĕшĕн пĕрре те ÿкĕнмеççĕ Ольга Михайловнăпа Александр Сергеевич.