11 июня 2010 г.
Июнĕн 1-мĕшĕнче Карапай Шăмăршă вăтам шкулĕнче ачасен сывлăхне çирĕплетекен "Солнышко" лагерь уçăлчĕ. Унта 1-7 классенчи вĕренÿре, обществăлла ĕçсенче лайăхпа палăрнă 30 ача канать.
Ачасен ушкăнне 2 отряда уйăрнă, вĕсене вĕрентекенсем ертсе пыраççĕ. "Ручеек" отряд (воспитателĕ Р.А.Лукьянова) – экологи пĕлĕвĕн, "Умники и умницы" (воспитателĕ А.В.Ермолаева) отряд художествăпа эстетика аталанăвĕн çул-йĕрĕсемпе ĕçлеççĕ.
Ачасем лагерьте куллен 8 сехет те 30 минутран пуçласа 14 сехетчен пулаççĕ, 3 хут апатланаççĕ. Шкул столовăйĕн поварĕсем Зоя Лукьяновапа Зоя Измайлова апата яланах ачасен кăмăлне каймалла пĕçерсе хатĕрлеççĕ. Ачасем лагерьте 21 кун канаççĕ.
Воспитательсем хăйсен отрячĕсемпе куллен тĕрлĕ вăйăсемпе конкурссем, викторинăсем йĕркелеççĕ, лагерьти пурнăç ачасемшĕн чылайлăха асра юлтăр тесе çине тăрса ĕçлеççĕ.