09 июня 2010 г.
Вун пĕрмĕшсемпе тăххăрмĕшсем халĕ патшалăх экзаменĕсене тытаççĕ. Часах, ак, вĕсем алла тивĕçлĕ пĕлÿ илнине çирĕплетекен документ илĕç. Çамрăксем умне çивĕч ыйту тухса тăрать: ăçта вĕренме каймалла, хăш профессие суйласа илмелле;
Чăваш Республикин Вĕрентÿ министерствинчен пĕлтернĕ тăрăх, кăçал профтехучилищĕсене тăватă пин ытла çамрăка йышăнма палăртнă. Вĕсенче хĕрĕх тĕрлĕ ытла специальноç суйласа илме пулать.
Ял хуçалăхĕнче чи кирлĕ профессисенчен пĕри – тракторист-машинист. Кÿкеçри вĕрентÿпе курс комбиначĕн Шăмăршăри вĕрентÿ класĕсĕр пуçне, ку профессие Патăрьелĕнчи 7-мĕш, Кÿкеçри 27-мĕш профтехучилищĕсенче тата Етĕрнери 25-мĕш профлицейре илме пулать.
Çамрăксем, уйрăмах хĕрсем хушшинче, çĕвĕç пулас текенсем сахал мар. Тархасшăн, вĕренĕр. Сире Канашри 2-мĕш, Улатăрти 7-мĕш, Çĕнĕ Шупашкарти 15-мĕш, Шупашкарти 23-мĕш профтехучилищĕсенче тата Шупашкарти 25-мĕш профлицейра хаваспах кĕтеççĕ. Вĕренме пур условисем те çителĕклĕ.
Паллах, çÿç касакансем те кирлĕ. Тен, ку тĕлĕшпе хăйсен ĕçне йĕркелесе ярас текенсем те тупăнĕç. Парикмахера вара маларах асăннă 3, 15, 23-мĕш профтехучилищĕсенче вĕренме пулать.
Инвалид ачасен те вĕренме майсем пур. Вĕсем, сăмахран, Сĕнтĕрвăрринчи 11-мĕш, Шупашкарти 23-мĕш профтехучилищĕсенче йывăçран художество изделийĕсене хатĕрлекен, çав училищĕсенчех çĕвĕç ăсталăхне алла илме пултараççĕ. Столяр-платник тата паркет саракан мастера Çĕнĕ Шупашкарти 14-мĕш прфтехучилищĕре вĕрентеççĕ. Ÿсен-тăрансене çитĕнтерекен мастер профессине Вăрнарти 29-мĕш профтехучилищĕре алла илме пулать.
С.Кузьмин, Шăмăршăри халăха ĕçпе тивĕçтерекен центр директорĕ.