23 июня 2010 г.
Çĕртме уйăхĕн 1-мĕшĕнчен пуçласа Пăчăрлă Пашьел вăтам шкулĕ çумĕнчи лагерьте 40 ача сывлăха çирĕплетет.
Кашни кунах тĕрлĕрен интереслĕ мероприятисем иртеççĕ. Воспитательсем, плана пăхăнса, çĕртме уйăхĕн 11-мĕшĕнче ачасене Палтиел ялĕнчен инçех мар вырнаçнă шыв упрамалли вырăна экскурсие илсе кайма палăртрĕç. Ачасем çак куна чăтăмсăррăн кĕтрĕç. Малтан ачасене воспитательсем "Шыв – çыннăн пурнăçĕнче" презентаци кăтартрĕç. Çакăн хыççăн ачасем хăрушсăрлăх правилисемпе тĕплĕн паллашрĕç те икĕ шкул автобусĕпе çула тухрĕç. Ачасене шыв упрамалли вырăнпа паллаштарнă вăхăтра район пуçлăхĕ В.П.Фадеев килсе çитрĕ. Часах кунта Чăваш Республикин экологи тата çут çанталăка сыхлас енĕпе ĕçлекен министрĕ А.В.Ермолаев çитсе чарăнчĕ. Вăл ачасене çак объект темиçе район çыннисемшĕн питĕ пысăк вырăн йышăнни çинчен каласа пачĕ. Таса шыв çын сывлăхĕшĕн пĕлтерĕшлĕ пулнине палăртса хăварчĕ, ачасен ыйтăвĕсем çине хуравларĕ. Министр часах ялсене сывлăхшăн сиплĕ таса шыв кашни килех çитессе шантарчĕ.
Кăçалхи шăрăх çанталăкра пусăри шыв та самаях чакрĕ. Пăрăхсем тăрăх таса шыв килни ял хуçалăхне пысăк пулăшу кÿрĕ. Таса шыв кашни килех çитсен ял халăхĕн сывлăхĕ те çирĕпрех пулĕ.