26 июня 2010 г.
ЧĂВАШ ЕН хăй 90 çул тултарнине Аслă Çĕнтерÿ тунăранпа 65 çул çитнĕ çулталăкра уявлани унăн чапне татах та ÿстерчĕ. Республика Кунĕ пире пурне те – кунта çуралса ÿснисене те, Чăваш Ен хăйсемшĕн иккĕмĕш кил пулса тăнисене те – пĕр тĕвве пĕрлештерчĕ.
Республика кунĕнче Шупашкарти Хĕрлĕ площадьре халăх пултарулăхĕн республикăри «Çĕнтерÿ салючĕ» фестивалĕн гала-концерчĕ пулчĕ. Унта хутшăннă 600 ытла хăй тĕллĕн вĕреннĕ артист куракансене чи лайăх номерсемпе савăнăç парнелерĕ. Фестивалĕн чи хисеплĕ геройĕсем – вăрçăпа ĕç ветеранĕсем пулчĕç.
Июнĕн 24-мĕшĕнче çавăн пекех халăх пултарулăхĕн Пĕтĕм Раççейри «Атăлçи çăл куçĕсем» XVIII фестивалĕн гала-концерчĕ те пин-пин çынна савăнтарчĕ. Мероприятие Чăваш Республикин Президенчĕ Н.В.Федоров хутшăнчĕ. Николай Васильевич республикăра пурăнакансемпе хăнасене Чăваш Ен 90 çул тултарнă ятпа хĕрÿллĕн саламларĕ.
Гала-концерта Раççейĕн 24 регионĕнчи тата чикĕ леш енчи 4 çĕршывран килнĕ илемлĕ пултарулăх коллективĕсем хутшăнчĕç.
Уяв мероприятийĕсене вĕçлесе, Пĕтĕм тĕнчери фейерверксен III фестивалĕ çĕрлехи тÿпене йăлтăр та йăлтăр çутатрĕ.
ИЮНĔН 24-мĕшĕнче Чăваш Ен Президенчĕ Н.Федоров Патăрьел районĕнче Республика кунне уявлама хутшăнчĕ.
Н.Федоров Президент, Раççейри Олимп комитечĕн пĕрремĕш вице-президенчĕ Игорь Казиков, «Россельхозбанк» ОАО Правленийĕн Председателĕн çумĕ Борис Листов Патăрьелĕнче стадион-площадка уçма хутшăннă. Çак стадионта республикăн ялти XII çуллахи спорт вăййисем иртеççĕ. Унта ялти спортсменсем çеç мар, механизаторсем, ĕне сăвакансем, утă çулакансем те хутшăнаççĕ. Физкультурăпа спорт комплексĕ тума 2008-2010 çулсенче Федераци бюджетĕнчен 10 миллион, республика бюджетĕнчи 29,1893 миллион тенкĕ уйăрса панă.
Патăрьел çĕрĕ çинче Президент хăйĕн мăшăрĕпе Светлана Юрьевнăпа, Федераци Канашĕн Комитечĕн председателĕн çумĕпе Леонид Лебедевпа тата «Россельхозбанк» ОАО Правленийĕн Председателĕн пĕрремĕш çумĕпе Борис Листовпа «Россельхозбанк» ОАО Чăваш регионĕнчи филиалĕн хушма офисне уçма хутшăннă.
«Хĕвеллĕ» уçланкăра Президент «Хир кунĕ – 2010» выставка-демонстраци ĕçĕпе паллашнă. Çĕнĕ йышши ял хуçалăх техникипе паллашнă май, Николай Васильевич комбайн рулĕ умне ларнă.
Н.Федоров Президент Патăрьелсене АЦ – 3,5-40 пушар машини тата куçса çÿрекен ятарлă комплекс (автоклуб) парнеленĕ.
Уява Пĕтĕм Раçейри халăх пултарулăхĕн XVIII фестивалĕн участникĕсем нихçан манăçми илем кÿнĕ, спорт ăмăртăвĕсем халăха савăнăçпа киленÿ парнеленĕ.
Пирĕн чаплă Республика 90 çул тултарчĕ, унпа тивĕçлипе мăнаçланмалла, ăна юратмалла. Чăваш Енĕн хăйне евĕрлĕ сăн-сăпат, пурнăç пĕр тикĕс аталанса пырать, çавна май тĕлĕнмелле мăнаçлăх, малашлăха шанса пурăнас туйăм çуралать.
«... Пурăнах эс ĕмĕр сывă
Пуринпе те тăванла.
Савнă çĕр, Чăваш çĕр-шывĕ,
Ут хастаррăн малалла!» – тенĕ Чăваш халăх поэчĕ Петĕр Хусанкай. Çапла пултăр!