30 июня 2010 г.
ИЮНĔН 24-мĕшĕнче Республика кунне халалласа иртнĕ халăх пултарулăхĕн фестивалĕсене пирĕн районти художество коллективĕсемпе уйрăм солистсем те хутшăннă.
К.В.Иванов ячĕллĕ академи драма театрĕ умĕнчи пысăк сцена çинче республикăри ачасен ытти паллă коллективĕсемпе пĕрле Васанти халăх музейĕ çумĕнчи «Мерчен» халăх фольклор коллективĕ (илемлĕх ертÿçи, аккомпаниаторĕ – Г.Ларшников) тата Виçпÿрт Шăмăршăри клуб çумĕнчи «Виçпÿрт çеçкисем» фольклор ушкăнĕ (илемлĕх ертÿçисем Л.Семеновапа А.Андронов) «Пĕчĕк çеç путене» фестивалĕн гала-концертĕнче хăйсен хитре юрри-ташшине кăтартнă. Жюри коллективсене сумлă Дипломсемпе чысланă.
«Çĕнтерÿ салючĕ» фестивалĕн гала-концертĕнче Чукалти Л.Рубцовапа Н.Ильичева – вырăс такмакĕсемпе, Шăмăршăри И.Медведев солист вăрçă вăхăтĕнчи «Моя любимая» юрăпа (аккомпаниаторĕ В.Харитонов), Çĕнĕ Тăрăнти Н.Полякова чăваш такмакĕсемпе (аккомпаниаторĕ В.Иванов) савăнтарнă. Площаде пухăннă йышлă халăх пирĕн коллективсемпе солистсен художество номерĕсене ăшшăн йышăннă, чылайччен алă çупнă.
Республика кунĕнче, Патăрьелĕнче, Шăмăршăри культура аталанăвĕн центрĕ çумĕнчи ачасен «Антонина» халăх ташă коллективĕ (илемлĕх ертÿçи А.Нефедова) уява килнĕ халăха тĕрлĕ ташăсемпе килентернĕ.
Çакна та палăртмалла: шăмăршăсен пултарулăхне Шупашкарта та, Патăрьелĕнче те ырласа йышăннă, хăй тĕллĕн вĕреннĕ артистсене тăвăллăн алă çупса саламланă. Республика уявĕ шăмăршăсен асĕнче нумайччен упранĕ.