30 июня 2010 г.
ÇУЛЛАХИ каникул кунĕсем... Илемлĕ те хаваслă вĕсем. Вĕренÿ вăхăчĕ хыçа юлнă. Ылтăн кĕркуннеччен канмалăх самай вăхăт пур-ха ачасен. Хăшĕсем çак тапхăрта лагерьте канаççĕ, сывлăхĕсене тĕреклетеççĕ, теприсем ашшĕ-амăшне пулăшма тăрăшаççĕ. Кашниех хăйĕн кăмăлне каймалла ирттерме тăрăшать каникула.
Çулла та шăплăх хуçаланмасть шкулсенче. Ачасен янравлă та хаваслă сассисем таçтанах илтĕнсе тăраççĕ. Шăмăршăри шкул алăкĕсем те яланах уçă. Мĕн ĕçлеççĕ-ха каникул вăхăтĕнче вĕренекенсем, мĕнпе интересленеççĕ; Вĕсен ĕçĕ-хĕлĕ пирки акă мĕн пĕлтĕмĕр. Ачасен сывлăха тĕреклетекен «Веснушки» лагерь пирки шкулăн аслă вожатăйĕ Н.Н.Милюшкина çапларах каласа кăтартрĕ.
– Шăмăршăри пĕтĕмĕшле вăтам пĕлÿ паракан шкулта каникул пуçлансанах ачасен «Веснушки» лагерĕ уçăлчĕ. Кунта 81 вĕренекен канма, пушă вăхăта усăллă ирттерме, сывлăха тĕреклетме пултарчĕ. Лагерь смени 18 куна тăсăлнă, вăл палăртнă çирĕп графикпа ĕçленĕ.Ачасене тăватă отряда уйăрнă. Кашни отрядăн ячĕ, девизĕ, тĕллевĕ пулнă. Пултарулăх енĕпе аталанма пулăшакан отрядра 4, 6-мĕш класра вĕренекенсем каннă. Вĕсемпе В.Кузьмина, З.Головинская, И.Ухваркина вĕрентекенсем тăрăшнă. «Радугăра» Н.Игнатьева, И.Ревунова, А.Яковлева вĕрентекенсем 5 классемпе экологи темине тĕпе хурса ĕçленĕ. Спортпа туслă ачасем «Спартак – чемпион» отряда кăмăлланă. Ăна Н.Куприяновпа А.Мулендеева ертсе пынă. 1-2 класрисем валли вара «Капитошки» ятлă отряд йĕркеленĕ. Ларса тăма пĕлмен шăпăрлансемпе Т.Удочкина, Ю.Яковлева, С.Юхвитова, М.Чураева пулчĕç.
Кашни кунах отрядсенчи ачасем тĕрлĕрен вăйăсемпе викторинăсенче, ăмăртусенче тупăшрĕç, тĕпчев ĕçĕсем ирттерчĕç.
Çавăн пекех Шăмăршă шкулĕн территорине те тирпей-илем кĕртес тĕлĕшпе сахал мар тăрăшни курăнать. Кунта хăйсен смени мĕнле ĕçлени пирки 8 «а» класс ертÿçи Л.Синякова каласа пачĕ:
– Пиллĕкмĕш ĕç чĕрĕкне эпир июнĕн 1-мĕшĕнче пуçларăмăр. Вунă куна тăсăлчĕ пирĕн смена. Çак вăхăтра эпир шкул çумĕнчи пахчара тăрăшрăмăр. Ачасем кăмăлтан ĕçлерĕç: йăрансене çумран тасатрĕç, шăварчĕç. Çавăн пекех чечек клумбисем те ăсталарăмăр.Халĕ чечексем ÿссе çитсе пурне те савăнтарасса шанатпăр.
8 «а» класран ĕç эстафетине 8 «б» класра вĕренекенсем йышăннă. Вĕсем те хастарлăхпа палăрнă.
– Эпир те хамăр тантăшсенчен начар мар ĕçлерĕмĕр, - пĕлтерчĕ Диана Тимофеева. – Пурте туслă, килĕштерсе йăрансене шăвартăмăр, çум курăкран тасатрăмăр. Кишĕр, хăяр, купăста тухăçлă çитĕнччĕр тесе вăй-хала шеллемерĕмĕр. Каннă вăхăтра эпир тĕрлĕрен вăйсем выляса савăнтăмăр.
Çу уйăхĕн вĕçĕнче çак шкулта 10 класра вĕренекенсем «Шăмăршă.ru» ятлă ĕç бригади йĕркеленĕ. Бригадăна ертсе пыма В.Хорькована шаннă. Шăмăршăри ĕçпе тивĕçтерекен центрпа килĕшÿ туса ĕçе пикеннĕ. Вуннăмĕш класс хĕрĕсемпе каччисен ĕçĕ-хĕлĕ пирки Юлия Шигарева каласа пама кăмăл турĕ:
– Каникулăн пĕрремĕш кунĕнченех бригадăри çамрăк ĕçченсем ĕçе пуçăнчĕç. 6 отряда пайланса хамăр ума лартнă тĕллевсене лайăх пурнăçлатпăр. Шăмăршă çумĕнчи хыр вăрманĕнчи Акатуй иртекен вырăна çÿп-çапран, туратсенчен тасатрăмăр. Шăмăршă лесничествинче те пирĕн валли ĕç тупăнчĕ. Ачасем пысăк хавхаланупа ĕçлеççĕ, кайăксен юррине итлесе савăнаççĕ. Пурĕ 150-ăн вăй хуратпăр. Пирĕн пата тĕп больницăран тухтăрсем те килсе çÿрерĕç, тĕрлĕ чир-чĕр çинчен каласа ăнлантарчĕç, асăрхаттарчĕç.
Отрядсемпе Т.Архипова, Н.Поликарпова, В.Бельцова, В.Мартынов, Ф.Алеева, Е.Романова, Е.Муромцева вĕрентекенсем пĕрле ĕçе тухаççĕ. 10-мĕш класс пĕтернисемпе пĕрле 9-мĕш класа хыçа хăварнисем те хаваспах ĕçе çÿреççĕ. Çапла, ÿркенмесен, ĕçе юратсан этем кун-çулĕ хаваслăрах иртет. Çакна Шăмăршă шкулĕн ачисем те лайăх ăнланаççĕ, çавăнпа савăнсах ĕçе васкаççĕ.