30 июня 2010 г.
РАÇÇЕЙ Федерацийĕ тĕнчери пирус чи нумай туртакан çĕршывсен шутне кĕрет. Унăн тĕрлĕ регионĕнчи арçынсен 60-82 проценчĕ, хĕрарăмсен 25-30 проценчĕ туртать. Чăваш Енре пурăнакансенчен 40 проценчĕ куллен пирус мăкăрлантарать. Çак йыш малалла ÿсет, туртакансен ретне хĕрарăмсем, ачасем, çул çитменнисем хутшăнаççĕ.
Пирус изделийĕ хатĕрлессипе Раççей тĕнчере виççĕмĕш вырăн (Китайпа США хыççăн) йышăнать. Иртнĕ вунă çулта пирус хатĕрлесси икĕ хута яхăн ÿснĕ. Туртнин инкекĕ – паянхи ачасем.
Пĕрлештернĕ нацисен организацийĕ пĕлтернĕ тăрăх, пирус туртакансен йышĕ хальхи пекех ÿссе пырсан паянхи 250 миллион ачана çывăх вăхăтра вăхăтсăр вилĕм кĕтет.
Çĕршывра пирус туртакансем çак сиенлĕ йăлана 8 çултан тытăнаççĕ. Шкулта вĕренекенсен 31,25 проценчĕ туртать. Чăваш Республикинче 11 çултан туртма тытăнаççĕ: арçын ачасен 15 проценчĕ, хĕрачасен 10,7 проценчĕ пируспа туслашать. Ача организмне никотин лекесси çемьери лару-тăруран килет. Çăвара пирус хыпакан ачасен 80 процентне яхăн ашшĕ-амăшĕ туртакан çемьерен. Туртман çемьесенче ку кăтарту 11-12 процентран ытла мар. Çакă та шухăшлаттарать, паян пулас ача амăшĕсен 50 процентне яхăн туртать.
Раççейре пирус туртнипе çыхăннă чир-чĕре пула çуллен нумай çын вилет. Çав шута чĕре-юн тымарĕн, шыçă чирĕсем кĕреççĕ т.ыт.те. Ÿпке чирĕпе аптракан та йышлă. Пирус тĕтĕмĕ туртманнисемшĕн те хăрушă.
Пĕтĕм тĕнчери сывлăх сыхлавĕн организацийĕ пĕлтернĕ тăрăх, пирус туртнине пула çыннăн ĕçлес туртăм чакать, чир-чĕре сиплеме тăкак çав тери нумай каять.
Акă мĕншĕн юлашки вăхăтра пирĕн республикăра туртнин сиенне хирĕçле юхăм анлăн сарăлчĕ. Çакна нумай пулмасть Чăваш Ен Президенчĕ Н.В.Федоров та палăртрĕ. Пирус туртни экономика аталанăвĕшĕн çав тери пысăк чăрмав. Унсăр пуçне çăвартан тухакан тĕтĕмпе мĕн чухлĕ укçа вĕçет! Туртакансем хăйсене кăна мар, туртманнисене те наркăмăшласа чире яма пултараççĕ, вĕсене сиплеме мĕн чухлĕ укçа пĕтет!
Чăваш Ен Президенчĕ ЧР Патшалăх Канашĕн, РФ Патшалăх Думин, Федераци Канашĕн депутачĕсене, мĕн пур шайри общество организацийĕсен вăйне пĕрлештерсе Чăваш Ене тата Раççее çак усалтан хăтарма чĕнсе каларĕ: «Атьăр-ха ăса кĕрер, хамăра хамăр, хамăр сывлăха, çемье бюджетне пулăшар», - терĕ республика пуçлăхĕ.