03 июля 2010 г.
КАХĂРЛĂ ШĂХАЛЬ каччине Валерий Кузнецов воин-интернационалиста асăнса Пуянкасси ял поселенийĕ футбол турнирĕ ирттерет. Ăна кашни çулах июнĕн юлашки вырсарни кунĕнче паллă тăваççĕ.
Çак куна ял поселенийĕнче пурăнакансем кăна мар, таврари ялсенчи çынсем те, республикăри ытти воин-интернационалистсем те чăтăмсăррăн кĕтеççĕ. Çамрăклах вăрçăра пуçне хунă В.Кузнецова ырăпа аса илеççĕ.
Пухăннисене саламласа, Пуянкасси ял поселенийĕн пуçлăхĕ В.Алексеев футбол турнирĕ уçăлнине пĕлтерчĕ. Вăйăсем ытти çулхи пекех хĕрÿ пулчĕç. Кубока çĕнсе илессишĕн хĕртсе пăхакан хĕвелтен хăрамасăр 5 команда вăйă уйне черетпе тухса вылярĕ. Çĕнтерÿçĕ кăçал Пуянкассинчи «Память» команда пулчĕ. Вăл финалта Шăмăршăри «Центра» парăнтарчĕ. Виççĕмĕш вырăнта – «Хамăр ял» (Шупашкар).
Çĕнтерÿçĕ командăна воин-интернационалист амăшĕ Мария Васильевна Кузнецова кубок пачĕ. Турнир вĕçленсен пухăннă хăнасем валли чаплă концерт пулчĕ.