07 июля 2010 г.
КĂÇАЛ Шăмăршăри вăтам шкултан вĕренсе тухнă выпускниксен сыв пуллашу каçĕнче – вăл июнĕн 25-мĕшĕнче иртнĕ – «Агросервис» ООО директорĕ, Чăваш Патшалăх Канашĕн депутачĕ А.В.Максимов тата Мускавра ĕçлесе пурăнакан В.В.Печников предприниматель тăван шкула спонсор пулăшăвĕ панă. Тăван шкулта юсав ĕçĕсем ирттерес, çĕнĕ вĕренÿ çулне хатĕрленес ĕçре 50 пин тенкĕ укçа сисĕмлĕ пулăшу пулĕ.
Александр Васильевичпа Вячеслав Валентинович вĕрентÿ ĕçĕ валли хăш-пĕр педагогсене те спонсор пулăшăвĕ уйăрнă. Шкулăн 1983 çулхи выпускникĕсен укçи-тенкипе усă курса физкультура учителĕ Н.А.Куприянов ачасем валли спорт инвентарĕ туянĕ. В.К.Семкина учительницăн вара хăйне çирĕплетсе панă вырăс чĕлхипе литература кабинетне юсаттарса илем кÿме май пулĕ. Н.А.Мартынова учительница вара А.В.Максимовпа тата В.В.Печниковпа пĕр класра вĕреннĕ пулнă. Александр Васильевичпа Вячеслав Валентиновичăн пулăшăвĕпе усă курса Наталья Анатольевнăн пуçламăш классен кабинечĕ мультимедиа центрĕпе пуянланĕ.
Тăван шкула манманшăн, спонсор пулăшăвĕ панăшăн педагогсем А.В.Максимовпа В.В.Печникова пĕтĕм чун-чĕререн тав тунă.