12 июля 2010 г.
+,Н,ЛЛЕ пурёнма в.ренсе пынă май пурнăçра темĕнле улшăну та пулса иртнине асăрхамасăр тăрса юлма пултараймастпăр. Пĕрмай çĕнни çинчен калаçаççĕ, тĕлĕнмелле хыпарсем пĕлтереççĕ. Самаях пуçа вататăн вара ăнкарса илессишĕн. Ара, пурнăç уттинчен юлма хушмаççĕ-çке. Çакна шкулта вĕренекен ачасем те питĕ лайăх ăнланаççĕ. Вĕсем те халĕ пурнăç çине çĕнĕлле пăхма пуçланă. Кашни ĕçшĕнех укçа тÿлеме ыйтаççĕ.
Çуллахи кун ял çыннишĕн уйрăмах ĕç нумайланать. Пахчара йăрансене çумран тасатмалла, кишĕре, çарăка, купăстана, хăяра кашни кунах шăвармалла. Унсăрăн пахча-çимĕçĕн тухăçне кураймăн. Вунă-вун пилĕк çул каялла кăна çак ĕçсене пурнăçлама ачасене явăçтаратчĕç. Колхоз хирĕнчи чĕкĕнтĕрпе çĕр улмине матиклеме те ашшĕ-амăшĕ тĕпренчĕкĕсене хăйсенчен хăварман. Халĕ вара ĕç пурнăçлас вырăнне ачасем хăйсене мĕн килĕшнипе аппаланаççĕ. Аслисем те питех ĕçлеттерессишĕн тăрăшмаççĕ пулас, хăйсемех пахчара çум çумлаççĕ, йăрансене шăвараççĕ.
Мăнукĕсем аслашшĕ-асламăшĕ, кукашшĕ-кукамăшĕ патне пулăшма кайма та ÿркенеççĕ. Мĕнле те пулин ĕç пурнăçлама ыйтсанах шăпăрлансем ним вăтанмасăр тÿлев хакне каласа хураççĕ. Ватăсене пулăшни çĕре ÿкменни çинчен пĕлмеççĕ пулас вĕсем. Ашшĕ-амăшĕ те çакăн пирки тĕпренчĕкĕсене ăнлантарни сисĕнмест. Ывăлĕ-хĕрĕ те хăйсен ватăлнă çыннисем патне пулăшма пыма васкамасть. Самана улшăнса пынăçем чунпа хытса пыра пуçларăмăр пулмалла çав. Пур ĕçе те укçа-тенкĕпе кăна хаклатпăр. Мулсăр пурăнма май çук, ăна пурте ăнланатпăр, анчах та çывăх тăвана пулăшнăшăнах нухрат кăларса пама васкас марччĕ. Никам та çĕр çинче ватăлмасăр пурăнмасть. Пурин валли те пурнăçăн пĕр саккунĕ хуçаланать, никам та унран пăрăнса юлаймасть.