14 июля 2010 г.
Çамрăксен професси ăсталăхне ÿстерес тĕллевпе районта çулленех "Çулталăкри чи лайăх çамрăк специалистсем" конкурс ирттереççĕ. Кăçалхи çĕнтерÿçĕсем те паллă ĕнтĕ. Вĕсенчен пĕри "Вĕрентÿ ĕçĕнчи чи лайăх çамрăк специалист" ята тивĕçни – Шăмăршăри пĕтĕмĕшле вăтам пĕлÿ паракан шкулти акăлчан чĕлхи вĕрентекенĕ И.Кудряшова.
Ирина Геннадьевна хăйĕн ĕç кĕнекине 2004 çулта уçнă. И.Я.Яковлев ячĕллĕ Чăваш Патшалăх педагогика университетне пĕтернĕ хыççăн тăватă çул Çĕнĕ Шупашкарти 10 номерлĕ шкулта ĕçленĕ. 2008 çулта вара Шăмăршă тăрăхне килнĕ, шкулта ачасене акăлчан чĕлхине вĕрентме тытăннă.
И.Кудряшова çине пăхсанах унра пысăк хавхалану, ăнтăлу палăрса тăнине туятăн. Умне лартнă тĕллевсене яланах пурнăçлама пултаракан вĕрентекен пулни сисĕнет. Урокĕсене те вăл хăйне евĕр интереслĕ, ачасене ăнланмалларах пултăр тесе ирттерет. Вĕренекенсене шухăшлама, танлаштарма,хăйсем тĕллĕн ĕçлеме хăнăхтарать.
6 "б" класс ертÿçи воспитани ыйтăвĕпе те тимлĕн ĕçлет. Ачасене хăйсене мĕнлерех тытмалли, тирпейлĕ калаçмалли çинчен час-часах аса илтерсех тăрать.
Ăслă та ĕçчен çын кăна пурнăçра хăйĕн тĕллевĕсем патне çитме пултарнине ĕнентерет.
Ирина Геннадьевна вĕренекенсен ашшĕ-амăшĕпе те тачă çыхăну тытать. Вĕсемпе час-часах тĕл пулса калаçать. Умра тăракан ыйтусене те ашшĕ-амăшĕпе килĕшсе татса пама тăрăшать. Çавăнпа хисеплеççĕ те ĕнтĕ ăна.
Шкул пурнăçĕпе обществăлла ĕçсене те хастар хутшăнать И. Кудряшова. Кăçал районти "Çулталăкри учитель-2010" конкурсра "Хавхалану тата артистлăх" номинацире лауреат пулса тăчĕ. "Чи лайăх класс ертÿçи" конкурсра вăл иккĕмĕш вырăн çĕнсе илме пултарчĕ.
Çамрăк вĕрентекенĕн пуласлăхĕ пысăк пуласса палăртаççĕ пĕрле ĕçлекенсем. И.Кудряшова педколлектив шанăçне тÿрре кăларасса шанасах килет. Малашне районти конкурссенче кăна мар, республикăра та çĕнтерÿçĕ ятне тивĕçмелле пултăр.