14 июля 2010 г.
Йывăрлăхсен умĕнче пуç усман, вĕсене çĕнтерме пултаракан çамрăксем пĕчĕк предпринимательлĕх ĕçне йĕркелеççĕ. Шăмăршăри çакнашкал çынсенчен пĕри – Л.Н.Степанова.
Чăваш патшалăх педагогика университечĕн художествăпа графика факультечĕн "Реклама дизайнĕ" уйрăмĕнче 5 курс пĕтернĕ Любовь Степанова Шăмăршăра хăйĕн специальноçĕпе ĕç тупăнманнине малтанах пĕлсе тăнă. Хула пурнăçĕ ăна илĕртмен. Çавна май вăл райцентрта хăйĕн пĕчĕк предприятине уçма шутланă.
– Шăмăршăра парикмахер салонĕсем çителĕксĕр пулнине шута илсе, эпĕ çак енĕпе ĕçлес терĕм, - каласа парать Любовь Николаевна. - Пĕлтĕр çу кунĕсенче Шупашкарти салонри ăстасем патĕнче çÿç касас ĕçе хăнăхрăм. Тĕрĕссипе, тантăшсен çÿçĕсене малтан та тикĕслекеленĕ-ха. Анчах та модăлла прическăсем тăвасси – хăйне евĕр искусство. Вĕренсе таврăнсан Шăмăршăри "Автовас" АОн администрацийĕпе аренда пÿлĕмĕ пирки калаçса татăлтăм. Кун хыççăн тăрăшса-тупăштарса Шупашкарта çÿç касмалли тĕрлĕ хатĕрсем, сĕтел-пукан тата ыттине туянса таврăнтăм. Хама пулăшма тепĕр парикмахера ĕçе илнĕ хыççăн, 2009 çулхи сентябрьте, пĕрремĕш клиентсене йышăнтăмăр.
Унтанпа часах çулталăк çитет ĕнтĕ. Тÿрех каламалла: Л.Н.Степанован салонĕ ăнăçлă ĕçлесе пырать. Хăйне пулăшакан Сюзанна Захаровапа пĕр-пĕрне ăнланса ĕçлеççĕ. Автостанци çуртĕнче вырнаçнă "Космос" парикмахер салонĕнче клиентсене яланах ăшшăн кĕтсе илеççĕ, çÿçĕсене каснă-тикĕсленĕ е сăрланă хыççăн кăмăллăн ăсатса яраççĕ. Çĕнĕ прическа тутарнă хыççăн хĕрсемпе хĕрарăмсем, çÿç кастарнă яшсемпе арçынсем парикмахерсене тав сăмахĕсем калаççĕ. Клиентсем салона чĕрне кастарма-тасаттарма тата сăрлаттарма та килеççĕ. Кăмăл пулсан, парикмахерсем клиентсене техĕмлĕ чейпе е ырă шăршăллă кофепе те сайлаççĕ. Тĕрлĕ пулăшусемшĕн тÿлемелли хаксем пысăках мар.
Çак кунсенче Л.Н.Степанова педагогика университетĕнче диплом ĕçне ăнăçлă хÿтĕлерĕ. Аслă пĕлÿ илнĕ ятпа Любовь Николаевнăна ăшшăн саламлатпăр, предприниматель ĕçĕнче ăнăçу сунатпăр.