17 июля 2010 г.
ЫТЛАРИ КУН район администрацийĕнче анлă канашлу иртнĕ, унта ял поселенийĕсен пуçлăхĕсем, ял хуçалăх предприятийĕсен, район центрĕнчи учрежденисемпе организацисен ертÿçисем хутшăннă. Канашлу ĕçне район пуçлăхĕ В.П.Фадеев ертсе пынă.
Кун йĕркинчи чи çивĕч ыйту – шăрăх та типĕ çанталăка пула ял хуçалăхĕ умне тухса тăнă кăткăс лару-тăруран тухмалли майсем шырасси. Район пуçлăхĕ выльăх апачĕ ытларах хатĕрлес тĕлĕшпе мĕнпур майсемпе усă курмаллине, ял хуçалăх предприятийĕсенче тата килти хуçалăхсенче выльăх-чĕрлĕх йышне сыхласа хăвармаллине палăртнă.
Канашлура вут-кăвартан сыхă тăрас, халăха ĕçмелли шывпа тивĕçтерес, пĕвесемпе кÿлĕсенче шыва кĕнĕ чух асăрхануллă пулас тата ытти ыйтусене те çĕкленĕ.
Районти хуçалăхсенче вырма ĕçĕсем пуçланнă май, уй-хирте çитĕнтернине пĕр тăккаламасăр, тирпейлĕ пухса илмеллине, чăн малтан вăрлăх хатĕрлемеллине палăртса хăварнă.