24 июля 2010 г.
ШĂМĂРШĂРИ вăтам шкултан вĕренсе тухакансем хушшинче çулленех ылтăн е кĕмĕл медале тивĕçнисем пулаççĕ. Вĕсем, паллах, обществăлла ĕçсенче те хастарлăхпа палăраççĕ. Пултаруллă выпускниксем хăйсен пĕлĕвне аслă вĕренÿ заведенийĕсенче малалла тăсаççĕ, килĕштернĕ профессие алла илеççĕ.
5 çул каялла Гульнара Салахова Шăмăршăри вăтам шкултан вĕренсе тухсан Чăваш патшалăх университечĕн юридици факультетне вĕренме кĕнĕ. Пĕрлех Чăваш патшалăх педагогика университечĕн каçхи уйрăмĕнче «Акăлчан чĕлхи» специальноçпа вĕреннĕ. 4 курс пĕтерсен ытти пултаруллă студентсемпе пĕрле СШАра практика ирттернĕ. Акăлчан чĕлхипе лайăх калаçнă май, унта Гульнара куçаруçă тата гид тивĕçĕсене пурнăçланă.
Шăмăршă хĕрĕ хăй тĕллĕнех турка чĕлхине те вĕреннĕ. Кăçал студентсен ушкăнĕпе пĕрле Турцие экскурсие кайсан, вăл çак çĕр-шыв çыннисемпе çăмăллăнах турка чĕлхипе калаçнă.
Çак кунсенче Шăмăршăри Салаховсем Чăваш патшалăх университетĕнчен В.Г.Агаков ректор алă пусса çирĕплетнĕ Тав çырăвĕ илнĕ.
«Хисеплĕ Мустафа Нурулловичпа Гельнур Фетиховна! – тенĕ çырура. – И.Н.Ульянов ячĕллĕ Чăваш патшалăх университечĕн ректорачĕ сире активлă пурнăç позицийĕллĕ хĕр ÿстерсе çитĕнтернĕшĕн чĕререн тав тăвать. Гульнара Мустафовна Салахова 5 çул вĕреннĕ хушăра обществăлла, культурăпа массăллă мероприятисенче палăрса тăчĕ, университетĕн наукăпа çутĕç ĕç-хĕлĕнче те хастарлăх кăтартрĕ.
Сире çирĕп сывлăх, çемье тăнăçлăхĕ, ĕçре тата ачăрсене воспитани парассинче ăнăçу сунатпăр».
Кунта çакна та хушса каламалла: Гульнара Салахова икĕ аслă вĕренÿ заведенине те нумаях пулмасть пĕтĕмпех «5» паллăсемпе пĕтернĕ. Çак кунсенче вăл пысăк конкурс витĕр тухса Шупашкарти строительство компанине юридици службине ĕçе вырнаçнă. Паллах, ĕçе илнĕ чухне Гульнара темиçе чĕлхе пĕлнине те шута илнĕ.