28 июля 2010 г.
2011 çулхи ноябрĕн 3-мĕшĕнче Чĕмпĕрти Чăваш шкулĕнче вĕренсе тĕнчипе палăрнă чăваш халăхĕн мухтавлă ывăлĕ Павел Миронов çуралнăранпа 150 çул çитет. Павел Миронович Миронов педагог, математик, чăваш халăхне çутта кăлараканĕ, И.Я.Яковлевăн аравасăр пысăк ĕçне малалла тăсаканĕ пулнă.
П.М.Миронов Пĕтĕм тĕнчери математиксен ăмăртăвĕнче çĕнтерсе Францири наука академийĕн премине илме тивĕçнĕ, çак академин чăн (действительнăй) членĕ пулнă. Ученăй 10 ытла математика учебникĕ пичетлесе кăларнă, вĕсен пĕлтерĕшĕ халĕ те пысăк.
Çураласса П.М.Миронов Тутарстанри Çĕпрел районне кĕрекен Çĕнĕ Йĕлмел ялĕнче çуралнă. Хăйĕн ĕçлĕ кун-çулне Чăваш Енри Шăмăршăри халăх шкулĕнче пуçланă.
Шел пулин те, халиччен П.М. Миронов ячĕ халăх асне тивĕçлипе кĕрсе юлайман темелле. Краеведсемпе уйрăм специалистсем çеç аса илкеленĕ ăна. Юлашки вăхăтра манăçа тухнисен ячĕсене вĕсем халăха тавăрса пама пуçланине палăртма кăмăллă. П.М.Миронов еткерлĕхĕ пирки те çапла каламалла.
Ку енĕпе Ульяновскра ĕçлесе пурăнакан скульптор, художник тата Чăваш писателĕсен Союзĕн членĕ Николай Григорьевич Кондрашкин çине тăрса ĕçленине палăртмалла. Вăл тăрăшнипе Ульяновск облаçĕнчи Чăнлă районĕнчи Вăта Тимĕрçен ялĕнчи вăтам шкул скверĕнче И.Я Яковлев вĕренекенĕ пулнă, ку шкулта ачасене чăвашсен малтанхи букварĕпе вĕрентнĕ Алексей Рекеев учитель палăкĕ ÿссе ларчĕ. Кăçалхи июнь уйăхĕнче Чăваш Республики кунне уявланă май Патăрьелĕнче Алексей Талвир писателе чысласа палăк уçăлчĕ. Унăн ăстаçĕ те Н.Г.Кондрашкин пулчĕ.
ЧНК иртнĕ аслă пухăвĕнче çаплах чăваш халăхĕн историе кĕрсе юлнă çыннисене палăксемпе вилĕмсĕрлетес енĕпе пуçланă ĕçсене малалла та туса пыма йышăннăччĕ. Çав шутра П.М.Миронов ятне те.
Çак тĕллевпе эпир Н.Г.Кондрашкин скульпторпа пĕрле Шăмăршă ялĕнче пултăмăр. Ку ыйтупа Шăмăршă район пуçлăхĕпе В.П.Фадеевпа тĕл пулса калаçрăмăр. Валерий Петрович тĕнче шайĕллĕ ученăй Шăмăршăра ĕçленине пĕлсен питĕ савăнчĕ, палăк лартас сĕнĕве хирĕçлемерĕ. Пĕрле тытăнсан кирек мĕнле йывăр ĕçе те ăнăçлă татса пама пулать вĕт. Çавна ĕненсе тăни пире пурсăмăра та ĕçре пулăшу парать.