31 июля 2010 г.
Ача чухне пиртен нумайăшĕ вĕрентекен е тухтăр пулма ĕмĕтленет. Ÿснĕçемĕн шухăшсем улшăнаççĕ. Анчах та Кахăрлă Шăхаль ялĕнче çуралса ÿснĕ Людмила Петрова (качча кайнă хыççăн Федотова) хăйĕн ача чухнехи ĕмĕтне улăштарма шухăшламан.
Ыттисем пекех вăл "больницăлла" выляма юратнă, пĕр май тухтăр ролĕнче пулнă. Ир пуçласа каçченех Людăн "больници" хăйсен урамĕнчи хĕр ачасемпе арçын ачасене йышăннă.
Хаваслă ачалăх кунĕсем ытла та хăвăрт иртсе каяççĕ-çке. Люда Пуянкасси шкулĕ хыççăн хăйĕн çутă ĕмĕтне пурнăçа кĕртес тесе Шупашкара çул тытнă, медицина училищине вĕренме кĕнĕ. Алла диплом илсе тăван кĕтесе, фельдшерпа акушер пунктне ĕçлеме килнĕ. Çамрăк специалист хăйĕн ĕçне чунтан юратса пурнăçланă, аслă юлташĕ Ю.Чернова фельдшер вĕрентсе пынине ăша хывса пынă. Ырă кăмăллă Людмила пулăшу ыйтма пыракан кашни çынпах пĕр чĕлхе тупма пултарнă: ваттипе ватăлла, ачапа ачалла калаçнă. Çак йĕркесене çыраканăн та ача чухне Людмила Михайловнăн сиплевĕпе усă курма тивнĕччĕ. Шăпах ун чухне фельдшер-акушер эмел сĕрсе, бинтпа çыхса сипленисĕр пуçне ăшă сăмах каласа та ача чунне лăплантарма пĕлнине туйса илнĕччĕ. Ял çыннисен сывлăхĕшĕн вăл çичĕ çул хушши тăрăшрĕ.
Пурнăç кустăрми ялан малалла чуптарать. Вăл темĕн те илсе килет, таçта та çитерет. Люда Пуянкасси йĕкĕчĕпе Николай Федотовпа пĕрлешсе çирĕп çемье чăмăртать. Çамрăк мăшăр пĕр вăхăт Ульяновск облаçĕнче пурăнать. Унта та Людмила Михайловна хăйĕн специальноçĕпех ĕçлет. Вырăнти ача садĕнче пĕчĕккисен сывлăхне тĕрĕслесе, сăнаса тăрать.
Çыннăн чун-чĕри, хăть те ăçта пулсан та, çуралса ÿснĕ кĕтеселлех туртăнать. Федотовсем те каялла Пуянкасси ялне таврăнаççĕ. Вăл вăхăтра колхозсенчи фермăсенче физиотерапи процедурин профилакторийĕсем ĕçленĕ. Людмила "Правда" колхозра вăй хума тытăннă. Кунта та вăл ырă енчен кăна палăрса тăнă.
Шăпа Людмила Михайловнăна районти тĕп больницăна илсе çитернĕ. 1994 çултанпа Л.Федотова клиникăпа диагностика лабораторийĕнче тăрăшать. Пултаруллă фельдшер-лаборант çынсенчен юн илет, биохимипе клиника анализĕ те тăвать. Хăйĕн ĕçне лайăх пĕлет вăл. Çавăнпах ăна лаборатори ертуçи пулма шаннă та ĕнтĕ. Света Борисова, Сильва Аркадьева, Ирина Удина, Юля Родионова лаборантсемпе килĕштерсе ĕçлет Людмила Михайловна.
Ĕç вырăнĕ çынна илем кÿмест, çын хăйĕн ĕçĕпе вырăна илемлетет теççĕ. Чăнах та çапла иккен. А.Федотова пек пултаруллă ĕçченсем хуть те ăçта та ырă тĕслĕх кăтартаççĕ, лайăхпа кăна палăрса тăраççĕ.