18 августа 2010 г.
КАШНИ çыннăн хăйĕн пурнăç çулĕ. Пĕрисем ăна ĕçри хастарлăхпа, пуçарулăхпа ирттерме тăрăшаççĕ, теприсем ĕç вырăнĕнче çĕнĕлĕхсем шыраççĕ...
Палтиел шкулĕнчи физкультура вĕрентекенĕ С.Сорокина хăйне аслă çул çине тухса професси суйласа илме пулăшнăшăн, спортпа туслаштарнăшăн Свердловск облаçĕнчи Артемовский хулинчи ачасемпе çамрăксен спорт шкулĕн тренерне С.Н.Тарелкинăна тав тăвать. Тăватă çул хушшинче çамрăк хĕр чаплă баскетболист пулса тăнă. Шкулпа сыв пулашсан С.Сорокина Шадринскри техникума вĕренме кĕнĕ, унтан ăнăçлă вĕренсе тухса физкультура вĕрентекенĕ тата пĕрремĕш категориллĕ судья пулса тăнă. 1988 çулта Светлана Леонидовнăна шăпа Палтиелне илсе çитернĕ.
С.Сорокина хăйĕн ĕçне чунтан юратать. Хăйĕн мăшăрĕпе Рудислав Петровичпа уроксемсĕр пуçне тренировкăсем те иртереççĕ. Палтиел шкулĕн ачисем районти тата республикăри ăмăртусенче те лайăх результатсем кăтартаççĕ. Выпускниксем хăйсен вĕрентекенĕсен çулне суйласа илни те савăнтарать: иккĕшĕ Чăваш патшалăх педагогика университетĕнче, иккĕшĕ Канашри педагогика колледжĕнче ăс пухаççĕ, çар училищисенче вĕренекенсем те пур.
Светлана Леонидовна хăй те професси конкурсĕсенче ырăпа кăна палăрса тăрать. 2000 çулта вăл районти "Çулталăк учителĕ" конкурсра мала тухнă, республикăра район чысне хÿтĕленĕ. Шупашкарта пулнă физкультура вĕрентекенĕсем тата тренерсен хушшинчи конкурсра та унăн пултарулăхне чи пысăк хак панă. "Атте, анне, эпĕ – спорт çемйи" уява та вĕсем яланах хутшăнаççĕ. Ăмăртусенче пĕрре мар çĕнтерÿçĕ ятне çĕнсе илне призерсен шутне кĕнĕ.
С.Сорокина йывăрлăхсем умĕнче пуçне усакан хĕрарăм мар. Вăл пур лару-тăруран та тухма пĕлет, кăткăс ыйтусене татса пама пултарать. Светлана Леонидовнăн вĕренекенĕсем кашни çулах районти олимпиадăсенче лайăхпа палăрса тăраççĕ, тĕрлĕ кăткăс хусканусем туса судьясене тĕлĕнтереççĕ. Пултаруллă вĕрентекен районти физкультура учителĕсенчен чи малтан ИКТпа усă курса уçă урок йĕркеленĕ. Вăл хăйĕн опычĕпе ыттисене те хаваспах паллаштарать.
Уроксенчен пушă вăхăтра вара Светлана Леонидовна шкулти обществăлла ĕçсене те хастар хутшăнать. Вăл шкулти уявсене ертсе пырать, учительсен КВН командинче те вылять. Слетсенче учительсене тĕрлĕ шÿт каласа парса савăнтарать. Çавăн пекех апат-çимĕç хатĕрлеме, детективсем вулама, велосипедпа ярăнма юратать. Сăвăсем хайлама та ăста вăл. Хăйĕн юлташла пародийĕсемпе, сăввисемпе тус-юлташĕсене тĕлĕнтерет.
Учитель çулĕнче Светлана Леонидовнăна татах та çĕнĕ çитĕнÿсем тума çирĕп вăй-хал сунатпăр.
Г.ИВАНОВА, районти çут ĕç пайĕн методисчĕ.