18 августа 2010 г.
ТУНТИ КУН район пуçлăхĕ В.П.Фадеев ирттернĕ канашлура шăрăх та типĕ çанталăка пула агропромышленноç комплексĕ умне тухса тăнă йывăр лару-тăруран тухмалли майсене тишкернĕ. Канашлу ĕçне ял поселенийĕсен пуçлăхĕсем, ял хуçалăх предприятийĕсен ертÿçисемпе тĕп бухгалтерĕсем, фермерсем хутшăннă.
Шăрăх вĕтеленипе пĕтнĕ тыр-пулшăн ял хуçалăх предприятийĕсемпе фермерсене патшалăх укçа парса пулăшать. Кун пирки район пуçлăхĕн çумĕ В.Н.Никифоров тата специалистсем тĕплĕн каласа панă. Район пуçлăхĕ В.П.Фадеев мĕнле йывăр пулсан та выльăх-чĕрлĕх йышне упраса хăвармаллине, выльăх апатне ютран туянма майсем шырамаллине палăртнă.
Валерий Петрович ялсенче тата вăрманта вут-кăвар тухасран сыхă тăрас, ял халăхне шывпа тивĕçтерес ыйтусене те çивĕч çĕкленĕ.