25 августа 2010 г.
ПĂЧĂРЛĂ ПАШЬЕЛĔНЧИ Тайруковсен çемйи ялта ĕçченлĕхпе, сăпайлăхпа палăрса тăрать. Çемье çуллен 2 ĕне усрать, пăрусем, сыснасем ÿстерет, сурăхсемпе чăх-чĕп тытать. Пĕлтĕр, сăмахран, 2 пушмакпа 1 вăкăр ÿстерсе сутнă. 3 пуç сысна çитĕнтерсе аш-какай сутни те çемьене сисемлĕ тупăш кÿнĕ. Паянхи кун Тайруковсен кил картинче пĕр пăрупа пĕр вăкăр, сыснасем çитĕнеççĕ. 2 ĕне суса предпринимательсене куллен 20-25 литр сĕт сутаççĕ.
Анна Алексеевна (питĕ шел, мăшăрĕ, Сергей, 20 çул пĕрле пурăннă хыççăн пĕлтĕр йывăр чире пула çĕре кĕнĕ) хăйĕн ачисене те куллен ĕçе явăçтарать. Вĕсем выльăх çими хатĕрлеме, выльăхсене пăхма пулăшаççĕ. Асли, Таня, Санкт-Петербургри политехника университечĕн Шупашкарти филиалĕн экономика факультетĕнче 2 курс пĕтернĕ. Вăл каникул тапхăрĕнче амăшне килти хуçалăх ĕçĕсенче пысăк пулăшу парать, вырма вăхăтĕнче "Бездна" фермер хуçалăхĕн йĕтемĕнче ĕçлерĕ. Кĕçĕнни, Арнольд, ялти вăтам шкулта 10 класс пĕтернĕ. Вăл килти арçын ĕçĕсене пĕтĕмпех хăй çине илме тăрăшать.
Йышлă выльăх-чĕрлĕх валли, паллах, выльăх çими те нумай кирлĕ. Çемье 2 ят çĕрĕ çинче çуллен нумай çул ÿсекен курăксем çулса, утă хатĕрлет. Анна Алексеевна "Бездна" фермер хуçалăхĕн ферминче вăй хунă май, ĕçшĕн тата пулăшу шучĕпе утă-улăм та, тырă та илет. Килти пахчара вара çĕр улми, чĕкĕнтĕр çитĕнтереççĕ. Кăçал, çанталăк условийĕсем йывăр килчĕç пулсан та, çемье кирлĕ чухлĕ выльăх çими хатĕрленĕ. Ку ĕçре, паллах, килти хуçалăхри Т – 40 трактор та пысăк пулăшу кÿрет.
Килти хуçалăхра йышлă выльăх-чĕрлĕх усрани çемьене тĕрлĕ тăкаксене чăрмавсăр саплаштарса пыма май парать. Кĕр кунĕсенче Тайруковсем пусă чавтарма ĕмĕтленеççĕ. Çитĕннĕ выльăх-чĕрлĕхе сутсан ку ĕçе пурнăçлама вĕсене йывăрах пулмĕ.